Guwahati, Iaiong 15: Palat 100 ngut ki briew ban kem pang kynsan kynsan na ka jingshah dait ha ki kynja khniang kiba don ki pung ri dohkha ha Sivasagar, Assam kaba la pynlamwir ïa ki bor pynïaid ka koit ka khiah, kiba ka pynlong ïa ka jingtohkit ba kyrkieh ban lap ïa ka tyllong.
Ia kane ka jingkem pang la pyntip nyngkong eh na Demow, ha kaba ki nongshong shnong kiba rung sha ki pung ban khwai dohkha bad ka jingleit sum leit sleh ki la ioh ia ka jingpang kaba kynsan kynsan kaba jur bha bud sa ka jingsma, ka jingprie, bad ha ki katto katne ki khep, ka jingpang kaba jur.
Kane ka jingjia ba phylla ka la paw nyngkong eh hadien ba uwei u nongshong shnong, u Shahidul Islam, u la ïathuh ba u la don dak mong kum ka jingshah dait ha ki kynja khniang ha ka por ba u dang tong dohkha.Ym slem la paw ki dak ki shin bad u la donkam ban shah sumar ha hospital.
Ki doktor kiba sumar ïa kine ki case ki ong ba ki daj jong ka jingpang kam ïahap bad ki rukom ba la tip kum ka jingshah puh bseiñ, bad kane kala pynmih ïa ka jingsngewkhia halor ka jinglah ban don ka jingthaw ba im ha um kaba ym pat lah ban ithuh.
“Ha kaba sdang ngi la suba ba ka dei ka jingshah puh ha ki bsein, hynrei ki dak ki shin ki long ki bym iahap bad ki jingpang ba ju jia” ong u Dr Surajit Giri, uba la sumar ïa ki katto katne ngut ki nongpang.
Namar ka jingbym don jingtip kumno ban sumar bad kiei ki jait dawai ba lah ban ioh, ki doktor kila hap ban shu sumar antad hi kum ki jingpyrshang
“Kane kam dei ka jingsumar kaba thikna kaba lah ban pynkoit, hynrei ka dei ka rukom kum ka jingpyrshang, kaba la sumar antad katkum ki dak ki shin ba paw ka jingpang kumba la ïohi,” ong u Dr Giri.
Ki ophisar ka tnad ka koit ka khiah ki la kyntu ïa ki nongshong shnong ba kin long kiba husiar bha haba ki rung ha ki pung bad ban leit wad jingsumar mardor lada jia ba ki shah dait ne ki dak jingpang kiba paw kynsan.
Ki bor ba dei khmih mynta ki dang buddien bha ia katei ka jinglong jingman, da kaba khot ban wad bniah da ki stad saian ban lap ia u jingthaw ba im ne ka daw kaba don shadien jong ki jingjia, namar ka jingtieng ka la saphriang hapdeng ki nongshong shnong kiba shaniah ha ka um jong ka pung na ka bynta ban pyndonkam ba man la ka sngi.
