Shillong, Iaiong 15: Ki Pulit ka Jylla kila kem ia lai ngut ki briew kiba suba donkti ha ka jingrong tuh ia ka suloi 303 jong u Pulit Homeguard, kaba buh hapoh ka store room jong ka karkhana MCCL, Sohra myn ha ka 11 tarik Iaiong.
Kine ki lai ngut ki kyrteng u Shaiborlang Jyrwa ba 21 snem na Maria Thymmai, Sohra, u Sawbor Sooting ba 20 snem na Mawkisyiem, Sohra bad u Teilang Sohkhia 19 snem ba na Marai Thymmai, Sohra.
Haba pyntip ia kane ha ka sngi Ba-ar, u Superintendent of Police ka East Khasi Hills Bah Vivek Syiem ula ong “Ia kane ka rifle la pyntip ba kala jah na ka store room jong ka karkhana MCCL myn ha ka 11 tarik Iaiong bad ngi la ujor ia ka ejahar. Hadien ka jingtohkit, ngi la rah ia arngut ki suba-u Shaiborlang Jyrwa bad Sawbor Sooting, kiba la ialam lynti ba kurup biang ia kane ka rifle”.
Ia kane ka rifle kaba don u nombor 3709740, la ioh kurup pat na ka iing jong ka kong Alpha Mary Jyrwa, ka Kmie-ieid jong u Shairborlang Jyrwa, kaba don ha Mawkisyiem, Sohra.
U bah Vivek u iathuh ba sa ia uwei u briew ba suba la kem pat kham hadien. Une u dei u Teilang Sohkhia.
“Kine ki briew kila kubur ba kila tuh ia kane ka rifle bad buhrieh ha kane ka Iing. Ngi la kurup ia ka rifle bad ngin sa ialam tian bishar ia kine ki laingut lashai ka sngi” bynrap u Bah Vivek.
