Shillong, Iaiong 11 : U Myntri Rangbah ka Jylla Conrad K Sangma, ha ka sngi Saitjain, ula pynkup burom ia 41 ngut ki khynnah skul kiba don jingduna ha ki dkhot met, kiba pass ia ka eksam SSLC 2026.
Kine ki Khynnah ki dei kiba pule ha ki jaka pule bapher bapher jong ka rilum Khasi bad Jaintia.
Haba kren ha ka jingialang jong ka jingpynkup burom kaba la pynlong da ka tnad Social Welfare jong ka Sorkar Meghalaya, u Myntri Rangbah ula ong “Naduh hynnin ka sngi ngi lah pynkup burom ia ki nongjop bad mynta ngi lah ioh biang ban rakhe ia ka jingjop ka jong phi bad ia ka jingshlur ka jong phi”.
Ula iaroh ia ka mynsiem jong kine ki khynnah kiba don ha ki jaka ri ia ki khynnah ki bapher bapher, u Myntri Rangbah ula ong, ba kam long kaba suk bad ka jinglong jingman ka dawa ia ka jingseisoh. “Mynta ma phi baroh phi la lah ban pynshisha ba phi long kiba don ia ka dor ban don hangne bad phi lah ban iakhun ia ki jingtynjuh bad ia ki jingeh kaba phi lah mad”.
Ula kyntu ia kine ki khynnah kiba la pass bha kiba don ha kane ka jingrakhe ba kidei ban bteng ban trei shitom da ka jingskhem jingmut bad jingiengskhem ha ka nongrim.
Nalor kane la sam ruh ia ka song pisa bad u Myntri Rangbah ula pynbna ba ha ka jingpule ha ka kyrdan Higher Secondary ia kine ki khynnah yn kyrshan da ka Chief Minister’s Secretariat.
Ha kane ka prokram la wan ban iashimbynta lang u Myntri ka pule puthi u Bah Lahkmen Rymbui bad ki heh ophisar ka tnad Social Welfare.
