Shillong, Iaiong 10 : U Chairman ka Estimate Committee ka Iingdorbar Thaw Ain ka Jylla Bah Mayralborn Syiem, ula pynpaw ia ka jingkyrmen ba ka jingkyntiew kyrdan ne pynheh ia ki Iingskul hapoh ka Mission Education kan pynmyntoi ia ki khynnah skul ha Meghalaya, khamtam ha ki jaka nongkyndong.
“Ngi la iakren sani bha halor ka jingpyntreikam ia ki jingtei jong ki bynta bapher bapher hapoh ki model college bapher bapher…bad kiwei ki jaka pule” ong u Bah Mayral haba iakren bad ki nongthoh khubor hadien ka jingialang bishar kam bad ki Ophisar jong ka Tnad Pule Puthi bad ki 5 tylli kiwei ki Tnad Sorkar ha ka sngi Thohdieng.
“Ka khubor ba sngewtynnad ba ngi ioh ka long ba lyngba ka Mission Education, kaba ka jingkyntiew kyrdan ia ki spah tylli ki skul lower primary ka iaid, kane ka dei ka kam ka ba bha bala shim ban pynthikna ba ki skul Sorkar ha ka Jylla, kaba ki longiing baduk ki phah iala ki khun ban ioh ia ka jingnang jingstad, kin long kiba biang nadong hadong”.
U bah Mayral u pynpaw ba ka jingkyntiew kyrdan ka kynthup ia ki skul lower primary, upper primary bad ki skul secondary ka Sorkar.
“Ka Sorkar kan ym lah ban leh shisien leh ia kane hynrei kan leh da ki bynta bynta. Mynta baroh ki jaka pule ka Sorkar kila sdang pyntrei bad nga kyrmen ba ha ki por ban wan, ngin sa iohi ia ki jingtei” ula ong.
Ka Committee kala shong bishar kam ruh ia ki project kiba hap hapoh ka tnad PWD bad PHE, haba bthah ba kin pyntrei sted ia ka kam.
