Shillong, Iaiong 10 : U Myntri Rangbah ka Jylla Conrad K Sangma ha ka sngi Thohdieng, ula pynkup burom ia ki khynnah pule ba pass bha shakhmat ha ka eksam Secondary School Leaving Certificate (SSLC) na ri-lum Khasi bad Jaintia, haba pynpaw ia kaei kaba u niew kum ka jingnang bha ka jingmih u soh ha ka pule dangle ha Jylla.
Ia kane ka jingialang pynkup burom la pynlong ha Iingsah u Myntri Rangbah ha CM Bunglow, Polo bad la iadonlang u Myntri ka tnad Pule Puthi Bah Lahkmen Rymbui, ki Heh Ophisar kynthup u Commissioner & Secretary ka Tnad Pule Puthi Vijay Kumar Mantri, ki Kmie Kpa bad ki Nonghikai.
Haba ai jingkren ha ka jingialang, u Conrad ula pynkynmaw ia ki jingsngewkhia halor ka jingduna jong kiba pass ia ki eksam SSLC jong ki snem bala leit, haba pynpaw ba ka jinglong jingman kam long satia kaba itynnad. Hynrei u ong ba kaei kaba long ba man mynta ka pyni ia ka jingkiew shakhmat.
“Ka long kaba sngewsih ban iohi ia ka jingpass duna ki khynnah, hynrei kiei kiei baroh kila sdang ban kham bha. Nga ngeit skhem ba ha ki snem ban wan, ngin nang lah ban wanrah ia ki jingkylla kiba kongsan ha ka kam pule dangle” ong u Myntri Rangbah.
Ula bynrap ba ka Sorkar Jylla ka dang bteng ban pynleit jingmut ha kaban pynkhlain ia ka rukom pyniaid ia ka pule dangle, ia kaba u soh ula sdang ban paw mynta.
Haba ai khublei ia ki khynnah pule ba pass bha shakhmat, u Myntri Rangbah ula ong ba ka jingpynkupburom ka dei kaba la leh da kaba thmu ban ai jingithuh ia ka jingtrei shitom jong ki bad ka jingdon ia ka mynsiem ialeh ia ki jingeh. Ula pynshlur ba kin im ha ka lynti kaba dei bad kut jingmut haba beh iala ka jingangnud.
U Conrad ula pynbna ruh ba ia kum kane ka jingialang pynkup burom ia ki khynnah ba pass bha shakhmat na ri-lum Garo, yn sa pynlong ha Tura ha ka 18 tarik Iaiong.
Ha kane ka jingialang, u Myntri Rangbah ula sam ia ka khusnam song pisa sha ki 40 ngut ki khynnah pule ba pass bha shakhmat, kaba la mang na ka Chief Minister’s Special Grant.
 na ri-lum Khasi bad Jaintia, haba pynpaw ia kaei kaba u niew kum ka jingnang bha ka jingmih u soh ha ka pule dangle ha Jylla.){kind=link}