Nagaland | Dawa ka NPP ban thep vote biang ha Koridang ba shah pynthut ki nongthep vote

Kohima, Iaiong 10: Ka National People’s Party (NPP) ka la tied ia ka jingkhang sha ka Election Commission ban thep vote biang ha Koridang Constituency jong ka Nagaland, haba kynnoh ba ki don ki jingbym iaid beit bad ka jingpynthut kaba jur ïa ka jingwan thep vote ki paidbah.

Katkum ka jingujor, ka seng ka la pynpaw ïa kaei kaba ka batai kum ka “jingbym iaid beit bad ba ima” ha ka jingïashim bynta jong ki nongthep vote ha ki jaka thep vote ha Alichen polling station kaba hap hapoh ka 28 Koridang Assembly Constituency.

Katkum ka jingtip ba thikna ba la kdew da ka seng, tang 1,323 tylli ki vote la thep na ki 3,310 ngut ki nongthep vote kiba don ha Alichen—kaba long tang 39.9%. Ka jingiapher kala paw ha ki jaka thep vote ba marjan ha kaba ka jingïashim bynta kala bun bha, kaba sdang naduh palat 70% haduh haduh 99%.

Da kaba kynnoh ba don ki jingbakla ha ka liang ka bor ba pyniaid bad ka jingpyntieng pynsmiej, ka NPP ka la ong ba ka jingdon jong ki briew jong ka IRB ka la pynmih ïa ka jingtieng hapdeng ki nongthep vote. Shuh shuh ka la kynnoh ba la sangeh noh ïa ka jingthep vote haduh shi kynta namar ka daw jong u nongpeit pyrman ka ECI bad ki bor synshar distrik, kiba la pynlong ïa ka jingpeit bniah ha ka por ba dang bun ki nongthep vote.

“Ym shym la shim ïa ki lad ki lynti kiba biang ban pynbeit iakine ki jingpynthut, kum ka jingpynjlan ïa ka por thep vote,” ong ka seng haba bynrap ba kane ka jinglong jingman kala ktah ïa ki nongthep vote kynthei, ki nongshong shnong kiba la tymmen, bad ki nongbylla sngi.

Ka party ka la kynnoh ruh ba ka lah ban don ka jingpyndonkam bakla ïa ki nongtrei ka sorkar jylla, kaba la pynmih ïa ka jingsngewkhia ba ki jingjia ki lah ban ktah ïa ka result jong ka elekshon ha ka constituency kaba ïakhun bha.

Da kaba kdew ïa ki sakhi lyngba ki video ba la ai sha ka Commission, ka NPP ka la kyntu ba ka jingpynthut bad ka jingbun jong ki bym wan ban thep vote ka lah ban ktah jur ia ka result.