Nongpoh, Iaiong 09 : Ki samla ka thain Mawhati, Ri-Bhoi District, kila byrngem ban khang tala ia ki artylli ki Primary Health Centre-ka Mawhati bad Mawlasnai PHC lad aka Sorkar kam lah ban pynbiang ia ki doktor bad ki dawai dashin ha kine ki jaka ai jingsumar ka Sorkar.
Kat kum ka jingiathuh ki samla ka thain, ka Mawhati bad Mawlasnai PHC kim shem la don Medical Officer ne doktor ba pura la bun bun bnai nalor ka jingbym biang ki dawai dashin, kaba la ktah ia ki paidbah jong ki phew tylli ki shnong kiba shaniah tylli ha ka jingshakri jong kine ki jaka sumar.
Ki samla ka thain bala lamkhmat da u Shanlang Diengdoh bad Donald Muktieh kila leit iakynduh markhmat ia ka District Medical & Health Officer bad aiti ia ka dorkhas ba dawa ban pynbiang ia ki doktor ba pura nalorki dawai dashin ha kine ki jaka sumar.
Haba kren sha ki nongthoh khubor, kine ki arngut kila pynpaw ba kum ki samla ki dap da ka jingsngewkhia ban sakhi ia ka jingeh ki paidbah ka thain halor ka jingbym lah ban ioh ia ki jingsumar kiba kyrkieh ha kine ki artylli ki jaka sumar namar ka jingbym don ki doktor bad ki dawai dashin.
Kila pynpaw ba ka jingdkoh ka jingshakri kine ki jaka sumar kala pynlong ia ki paidbah ban hap leit wad ia ki jingsumar shaduh shaUmsning bad kiwe ki jaka ne sha Shillong, kaba ktah jur ia ka jinglut jingsep haba phai sha ka leit ka wan bad kiwei kiwei ki jinglut. Kila pynpaw ba kam don jingmut ban buh ia kine ki jaka ai jingsumar lada kimlah ban pynbiang ia ka jingshakri ia u paidbah.
Kila dawa ia ka DMHO ba kan shimkhia mardor ia kane ka jingeh haba byrngem ba lada kam lah ban leh eiei mardor, ki samla ka thain kim banse ban khang khyrdep noh ia kine ki jaka ai jingsumar.
