Shillong, Iaiong 08 : U Myntri Sorkar bad Nongialam ka BJP Bah Sanbor Shullai ha ka sngi Balang ula iathuh ba ki nongialam ka BJP na Delhi kila ai ka jingmynjur ban pynieng kyrtong ha ka elekshon shiteng samoi ban wan jong ka Shillong Lok Sabha, haba bynrap ba u long uba khreh ban iakhun lada ka party ka rai ban ai ticket ia u.
“Ka kaiphid na u State President bad ki nongtrei ka party….lah dep ban phah sha ka High Command. Ka party na Delhi kala ai jingmynjur ba ngi hap ban iakhun. Ka BJP kan hap ban iakhun ia ka elekshon shiteng samoi ka Shillong Lok Sabha” ong u Bah Shullai haba iakren bad ki nongthoh khubor.
U pynpaw ba ka sienjam ban khot aplikeshon kam pat sdang satia. “Hynrei, ha ka sngi ba ngi don ia ka 47th foundation day jong ka party, kila ong ba ki nongialam na Delhi kila ai jingmynjur ia u State President (hynrei un) dang ban khot ia ka aplikeshon” ula bynrap.
Haba kylli la u kloi ban iakhun ia ka elekshon, u Bah Shullai ula ong “Nga dei u shipai ba don discipline jong ka party. Lada ka High Command lane ki Nongialam ka Jylla ki bthah ia nga ban iakhun, kum u shipai ba don discipline, ngan hap ban mih sha ka madan thma bad iakhun”.
Haba pynkynmaw ia ka jingpynieng ia u ha u 2019, ula ong “Ha u snem 2019, khlem ka jingpoi pyrkhat ba lai taiew shuwa ka elekshon MP, na ka Ophis ka party ha ka por 12 baje shiteng miet, kila phone ia nga bad pyntip ba ka shithi kala wan poi na Delhi ba la pynieng ia nga kum u kyrtong na ka BJP ha u 2019. Kum u shipai ba don discipline jong ka party, ha ka sngi ba bud hi nga la mardor bad pynkhreh shaid shaid. Shu pyrkhat ma phi, tang hapoh lai taiew ka por ba nga ioh ban iaid ialap elekshon ha ki 36 tylli ki constituency”.
“Ha kane ka kynti ba mynta ngam tip satia iano ba ka party ka jied ban long kum u kyrtong” bynrap u Bah Shullai.
