Guwahati, Iaiong 8: U Myntri Rangbah ka Assam Himanta Biswa Sarma ha ka sngi Balang u la ther tyngeh ïa u president ka Congress Mallikarjun Kharge halor ka jingkren jong u ha ka jingïalang ialap elekshon dang shen kaba la nang pynjur ia ka thma ktien ha ka saiñpyrthei ha shwa ka jingthep vote.
Da kaba kynthoh beit beit ha doh ia u Kharge, u Sarma u la buh jingkylli ia ki jingkren jong u bad u la kyntu ban khot ia ka kynhun tohkit da ki central agency halor ki jingkynnoh ba la pynpaw ha ka jingialang paidbah.U la kynthoh ia ka jingkren jong u Kharge kum ka “bym don jingkitkhlieh” bad kynnoh ia u ba u la kam khlem da pynshisha.
“Balei ban wanrah ia kum kine ki kot ki sla khlem da pynshisha ia ki? Mynta phi ong ba phin sa ia kren bad u Myntri ka External Affairs—bad balei phim shym la leh kumta kham mynshuwa?” La ong u Sarma ia kane haba kren sha ki lad pathai khubor.
U myntri rangbah u la thew ruh ia u nongialam ka Congress u Pawan Khera, da kaba u la kynnoh pyrshah ia u bad ia ka iing ka sem jong u bad mynta u la “phet rieh.” U Sarma u la pynskhem ba ki Pulit Assam kin shim khia ïa kaba donkam bad pynthikna ba ïa kito kiba donkti yn pynngat hapoh ka bor jong ka aiñ.
Da kaba pynjur shuh shuh ïa ka jingkynthoh ba jur, u Sarma u la kynnoh ba kane ka jingïakynad ka lah ban don ka jingïadei bad u Rahul Gandhi u nongïalam ka Congress, da kaba kynnoh ba “ki kot ki sla kiba thok” ki lah ban saphriang hapoh ka seng.U la ong ba yn sa mudui pyrshah ia baroh kiba lap ba ki donkti.
“Ngi kyrmen skhem ban jop haduh 104 seat lada ka jingwan ki nongthep vote ka long kaba bun”, u la ong haba kdew sha ka elekshon sha ka Iingdorbar Thawaiñ ka ban sa wan.
Shibun ki nongïalam ka Congress ki la kynthoh ïa u Himanta Biswa Sarma halor ka jingpyndonkam ïa ki ktien kiba khor haba kren sha ki paidbah bad ha ki lad pathai khubor bad wat la katta ruh ym pat leh eiei.
“U la pyndonkam da ki kyntien kiba ngim lah ban kren, bad u la kren ia ka sha ki paidbah.U dei u Myntri Rangbah, kane ka mut ba um don jingsngew ei ei ia ki paidbah jong ka jylla, ka ri, ne ia ki lad pathai khubor jong ka ri. Ka rukom ba u pyndonkam ia ki ktien kiba bein ha ki jaka paidbah, bad ym shym la don kano kano ban shim kam pyrshah ia u” u la ong bad bynrap ruh “Kumno ka Election Commission ka sngap jar jar ha kaba iadei bad kane?… Kino kino ki Myntri Rangbah kiba kren pyrshah ia ki dkhot jong kano kano ka seng sain pyrthei ha kum kane ka rukom dei ban pynrem jur….Ka jingpyntieng ne ka jingbyrngem sha ki dkhot ka liang pyrshah kala dei ka bynta ne ka jinglong jong ka BJP” la ong u nongialam ka Congress u Bhupesh Baghel.
Ha Assam ka sngi thep vote kan dei ha ka 9 tarik Iaiong (kata lashai ka sngi), ha baroh ki 126 tylli ki constituency.
