Aipor 3 bnai ka JCMDA ia ka Sorkar ban thaw Mining Policy kat kum ka jinglong ki jaka

Shillong, Iaiong 08 : Ka Jaintia Coal Miners and Dealers Association (JCMDA) kala aipor lai bnai ia ka Sorkar Jylla ba kan thaw ia ka scientific mining policy kaba iahap bad ka riti bat khyndew bad ka rukom long ki jaka hapoh ka thain.

Haba kren sha ki lad pathai khubor hadien ka rally paidbah ha East Jaintia Hills, u Vice President ka JCMDA bad MLA barim ka Khliehriat Bah Justine Dkhar ula ong ba ka Sorkar kam shym la lah ban wanrah ia ka mining policy kaba iahap watla 12 snem kila iaid naduh u snem 2014.

“Ngi dawa ia ka Sorkar Jylla ban wanrah noh mardor ia ka mining policy kaba iada ia ka mariang bad pynthikna ia ka jing shngain jong ki nongbylla” ula ong.

U Bah Dkhar ula ban jur ba kane ka policy ba mynta, kaba pynleit jingmut ha ka open cast mining, ka dei ka bym iahap satia bad ka jinglong jingman ki jaka ha ka thain.

“90% na ka thain jong ngi kim iahap satia ban tih par da ka open cast. Ngi donkam ia kiwei pat ki rukom tih par, bad ka Sorkar ka dei ban pynkylla ia ka rukom kaba rim ban iada ia ka mariang bad pynthikna ia ka jingioh kamai jakpoh” ula bynrap.

Ka JCMDA kala aiti ia ka dorkhas sha u Myntri Rangbah Conrad K Sangma, kaba dawa ia u ba un leh eiei halor kane ka kam kaba ktah ia ki hajar tylli ki longiing kiba shaniah naka kam tih dewiong.

“Haduh mynta, ngim pat ioh ia kano kano ka jingiarap ne jingkyrshan na ka bynta kii longiing kiba shah ktah ha ka jing khang tih dewiong, kiba la iaksaid ban pyndap ia ki jingdonkam” ula ong.

U bah Dkhar ula maham ba lad aka Sorkar kam lah ban leh ia kaba dei, ka Association kan sa shim rai ia kaei kaba ka dei ban leh.

“Ngin ym shu sngap ia ka jingnang pynslem. Ngi kwah ia ka policy kaba shah ia ngi ban trei, iada ia ka mariang bad pynthikna ia ka jingshngain ki nongbylla jong ngi” ong u Bah Dkhar.

Ka Association kala ai ruh ia kane ka juh ka dorkhas sha ki Symbud Myntri Rangbah Bah Prestone Tynsong bad Bah Sniawbhalang Dhar nalor ki MLA na ri-lum Jaintia, ba pan ia ka jingkyrshan jong ki ha kaban pynbeit ia kane ka kam.