Kyntu u MLA ka Nongpoh ban pynbeit ryntih ia ki lad jingiarap sha ki lanot lynshop bor mariang

Shillong, Iaiong 06: U Chairman ka Meghalaya State Health Advisory Board (MSHAB) bad MLA ka Nongpoh constituency bah Mayralborn Syiem u la kyntu ia u Myntri ka tnat Revenue and Disaster Management Bah Lahkmen Rymbui ban pynbeit ryntih ia ki lad jingiarap iaki ba shah ktah naka bor mariang haki district jong ka Jylla baroh kawei.

Ha ka dorkhas bala shah sha u Myntri, u Bah Mayralborn u la pynpaw ia ka jinglong jingman jong ka Meghalaya ha ka jingshlei um, ka jingtwa khyndew, bad ka jingbym shngain ka bor mariang da kaba ban jur ia ka jingdonkam ban ai jingiarap kloi bad ban don lypa ka jingpyllang iaka pisa.

Ia u MLA ka Nongpoh constituency la synran lang da ki Rangbah Shnong na ki 20 tylli ki shnong, ia kaba la ai ka jingtyrwa ïa ka rukom treikam kaba kham ryntih bad kaba kham sted na ka bynta ban pyllait ïa ka pisa na ka State Disaster Management Authority sha ki bor district ha ka por ba jia ki jingjia ba sngewsih.

“Ka jingpynslem ha ka jingpyllait iaka pisa bunsien ka khanglad ia ka jingtreikam ai jingiarap mardor” la ong u Bah Mayralborn.

U Bah Mayralborn ula ban jur ban mang pisa kham bun shaki bor district khnang ba ia ki tiar jingiarap kum ki marbam, ki tin sop iing, yn lah ban sam shaki lanot khlem da donkam ap jingmynjur naki bor ba halor.

“Kane kan pynlah ban sam mardor ïa ki tiar jingïarap kiba donkam sha ki longïing bad ki nongrep kiba shah ktah” ula ong.

U MLA u la pynpaw ïa ka jingkyrmen ba kan don ka jingshimkhia na u Myntri da kaba kdew ba ki jingpynkylla kin pynkhlain ïa ka jingpynkhreh na ka bynta ki jingjia ba sngewsih ha ka Jylla.

Haba ïakren sha ki lad pathai khubor, u Bah Mayralborn ula ong “Kum u MLA nga sngewkhia ïa ka jingshah lynshop ha ka bor mariang ha ki bynta bapher bapher jong ka jylla.”

U MLA u ai khublei ïa u Myntri ka tnat Revenue and Disaster Management iaki jingkular bad pynpaw ba un shimkhia bad buddien ïa kane ka mat ban pynthikna ba ki longïing bad ki nongrep kiba shah ktah kin ïoh kloi ïa ka bai lutksan jong ki.

U la pynksan ia ka jingdonkam ban siew bai lutksan kloi bad ban buh lypa ka pisa haki bor district hashuwa ka aiom lyiur kata naduh u bnai Lber haduh Jymmang.

“Ngin sa buddien ïa kane ka kam na ka bynta ka jingsiew bai lutksan kaba kloi bad kumjuh ruh ban buh lypa ka pisa haki bor district hashuwa u bnai Lber haduh Jymmang namar kane ka por ba ka bor mariang kam long kaba shngain bad kane kan iarap iaki bor district ban ai jingiarap iaki lanot” ula ong.