Shillong, Iaiong 06 : Ki Pulit ka Jylla ha ka janmiet sngi Nyngkong, kila lap ia ka metiap jong ka Kynthei briew kaba jah naduh ka 20 tarik Lber, kaba la per ha ka wahduid kaba don ha khappud ka Shnong Nongrah bad Lapalang.
Ki nongshongshnong ka thain kila iohi nyngkong ia kane ka metiap kaba la song ha ka byrni bad mar mar kila pyntip sha ki bor shnong, kiba la pyntip pat sha ki Pulit ka Rynjah Police Station.
Ka kynhun ki Pulit ba kynthup ia ki Crime Scene Unit, kila poi sha katei ka wahduid bad kila lum ia ki sakhi satar hashuwa ban sei ia ka met.
U Superintendent of Police ka East Khasi Hills Bah Vivek Syiem uba la leit hi dalade sha katei ka jaka, ula pynthikna ba kane ka metiap ka dei jong ka kong Eilang Phawa ba na Lawjynriew, Nongthymmai, kaba dei shnong tai na West Jaintia Hills.
Kat kum ka jingong jong u, ki bahaiing kila pyntip ba kane ka kong kala jah na iing naduh ka 20 tarik Lber, 2026.
Ia ka jingpyntip ba jah la register ha Rynjah Police Station bad la phah ruh ia ki notice ban wad sha kiwei ki District bad ki Jylla, hynrei ym shym la ioh satia ia kano kano ka jingtip shano ba ka don.
“Hynne, ia ka met la lap ha ka byrni plastic bala the bad bret sha kane ka wah kaba don hapdeng ka Lapalang bad Rynjah” ula ong.
Ia ka met la kit noh sha North Eastern Hill Regional Institute of Health and Medical Sciences (NEIGRIHMS), bad yn leh ia ka post mortem lashai ka sngi Ba-ar.
“Ngi la register ia ka case bad ki Pulit kin trei shitom ban pynthikna ba ki nongleh bymman kin ngat ha ka ain. Ngi la ioh katto katne ki sakhi halor ki briew ba donkti” ong u Bah Vivek.
U SP u bynta ba ka met kala kem pyut bad ia ka daw ka jingiap yn sa pynthikna hadien ka post mortem.
“Hadien ba ngi la ioh ia ka kaiphod, ngin sa lah ban tip ia kum kiei ki jingmong bad kumno kane ka kong ka shah pyniap. Ngin nang tohkit shuh shuh ban tip ia ki daw bad kaei kaba lam sha kane ka kam bymman” ula ong.
