Shillong, Iaiong 05: Ki paid riewngeit Khristan ha kylleng ka jylla Meghalaya bad ha ka ri hi baroh kawei, ha ka sngi u Blei, kila rakhe da ka jingmen ia ka Jingmih pat jong u Trai Jisu Khrist kaba la tip ruh kum Easter Sunday ne Resurrection Sunday.
Ha kane ka sngi, dang step phyrngab ki riewngeit Khristan kila leit sha la ki ïingmane ban iashimbynta ha ka ‘Sunrise Service’ ne ka jingiaseng kaba la pynlong mar ia ka kynjatshai ban rakhe pyndonburom ia ka jingmih pat u Jisu Khristan hadien 3 sngi ba ula shah iap halor ka diengphna na ka bynta ka pop jong ki khun bynriew ha ka sngi Thohdieng ia kaba la tip kum ka ‘Good Friday’.
Ha kane ka sngi kaba kyntang jong ki Khristan, la sakhi ba naduh ka por mynstep ki riewngeit kila leit sha ki iingmane kiba don ha kylleng jong ka nongbah Shillong bad ki riewngeit Khristan kila iashimbynta shitrhem ha ki Mass Bakhuid bad ha ki jingiaseng ban rakhe ia ka Paskha kaba u khun ba marwei jong u Blei u Jisu Khrist ula mih pat.
La sakhi ba ki khynnah rit haduh kiba la noh ka rta kila leit sha ki iingmane ban shakri ia u Blei bad ruh ban buh jingduwai kyrpang ha kane ka sngi kaba kyntang bad la sakhi ba bun ki iingmane kila dap smam da ki riewngeit Khristan kiba la iarwai bad ban shah shkor ruh ia ka khubor kaba la ialap da ki nongsharai Balang.
Kane ka jingrakhe ia ka Easter Sunday kala long kaba shongkun ha kylleng ka rilum Khasi, Jaintia bad Garo.
