Boko, April 4: U Myntri Rangbah ka Jylla Conrad K. Sangma ula pynkhreh ban leit ialap elekshon kaba heh ha Bongaon, kaba hap hapoh ha Boko-Chaygaon constituency ha ka 6 tarik u Iaiong, na ka bynta u kyrtong ka seng National People’s Party u ban iakhun ia ka elekshon jongka Assam Legislative Assembly 2026.
Ki jingpynkhreh kila iaid shakhmat ha Santi-Nijora Club, ha kaba ki nongialam kiba rangbah kiba kynthup ia u MLA Pongseng R. Marak bad Vice-President ka NPP u I. Hemochandra Singh kila khmih bniah ia ka jingpynkhreh baroh ryngkat bad u kyrtong ka seng u Ganseng B. Sangma, uba iakhun na ka 28-Boko-Chaygaon (ST).
La khmih lynti ba ha kane ka jingialang kan khring ia ki nongialam ka seng bad ia ki nongtrei ka seng na kylleng ki jylla, ha kaba ka NPP ka thmu ban pynsngew bad rah shajrong ia ki jingiohi jngai kum ka seng riewlum bad ban pyniar ia ki lynti iaid ki jongka hapoh ka jylla Assam.
Kane ka jinglong jingman kadei hadien ba dang shen, la plie ia ka ophis treikam ka seng hajan ka National Highway 17 ha Boko da u Hemochandra Singh bad u Myntri Sorkar ka Meghalaya u Marcuise N. Marak hadien ba kila ialap elekshon baroh shi sngi hapoh kane ka constituency.
Ki nongialam ka seng kila pynpaw ba ki don ia ka jingngeit kaba skhem halor ka jingnang roi ka jingioh jingkyrshan bad kam ba kala don ruh ka jingkiew ha ka jingwan rung ki dkhot kiba thymmai kiba kynthup na ka seng BJP bad Congress.
U Marak ula ong, ba ia ka NPP la seng ha u snem 2012 bad kala iar sted bha ha kylleng ki jylla ka thain shatei lammihngi bad kala pynsawa ia ka sur jong ka jingkyrmen ba ka jylla Assam ka lah ban jied ia u nongthawain uba nyngkong eh na ka seng NPP.
Haba kyntait ia ki jingkynnoh ba ka iaid ryngkat lang bad ka seng BJP, kumta ka NPP kala pynpaw ba kadei ka seng sain pyrthei kaba iaid laitluid marwei kaba buh ialade kum kata kawei pat ka bor ha ka jingiakhun ia ka elekshon.
