Dawa ki Khristan ban weng noh ia ka FCRA Amendment Bill | Maham ba kyntur ia ka hok

Shillong, Iaiong 04: Ka All India Catholic Union (AICU) kala dawa ba dei ban pynsangeh noh mardor ia ka Foreign Contribution (Regulation) Amendment Bill, 2026 haba maham ba kane ka jingtrwa ia kane ka Bill kan iuhroit ia ka jinglong laitluid ki niam bad ia ka hok jong ki ritpaid.

Ka Foreign Contribution (Regulation) Amendment Bill, 2026 la wanrah ha ka Lok Sabha ha ka 25 tarik u Lber 2026. Kane ka ain ka pyrkhing ia ka jingpdiang bad jingpyndonkam ia ka jingnoh synniang kaba nabar ri da ki riewshimet, ki kynhun ne ki karkhana.

Ha ka kyrwoh, ka AICU kala ong ba ki riewngeit Khristan kin ym lah ban pdiang ia kano kano ka jingkhanglad ne jingpynslem bad kila pynbor ba ia katei ka bill dei ban pynduh pyndam noh shi syndon. Kala pan ruh ia ka jingai jingkular na ka sorkar pdeng ba kam dei ban don kano kano ka jingpyrshang ban tehlakam ia ki jaka pule ne ki jingdon jingem jong ki iingmane ne balang.

Kane ka seng kala kdew ia ki kyndon ha katei ka bill ba kan ailad ia ki bor kiba dei khmih ba kin shimti ne ban weng noh ia ka jingpyndonkam ia ki jingdon jingem kiba la shah pynduh ne pynsangeh noh ia ka FCRA Licence bad kila ong, ba kane kadei ka “jingwan kyntur pud kaba shyrkhei bha” ha kaba iadei bad ka jingioh jingiada na ka riti synshar.

Kila pynpaw ba kum kane ka bor ka pynkhein ia ka hok kaba la pynkup bor ha ka Articles 25 bad 26, kaba pynthikna ia ka hok ban mane laitluid bad ia ka bor ban pyniaid ia ki jaka pule bad kiwei kiwei.

Ka AICU kala buh jingkylli ruh ia ka rekod treikam jong ka sorkar bad ka kynnoh ba ka jingpyntreikam ia ka FCRA ha kine ki snem kala ktah jur bha ia ki jaka treikam kiba iadei bad ka pule puthi, ka koit ka khiah bad ki kam kiba iadei bad ka imlang sahlang.

Haba kdew ia ka kaiphod jong ki 700 tylli ki jingthombor pyrshah ia ki Khristan ha u snem 2025, kane ka kynhun kala ong, ba ki riewngeit Khristan kila mad ia ka jingeh kaba khraw bad kim don hapdeng ka jingshngain, ha kaba kila don ki jingjia la pynthud ia ka jingiaduwai, ka jingpynjot pynpra bad ka jingthimbor kaba la ujor ha kylleng ki jylla.

“Ia kane ka mat ym lah ban shim kum ka mat kaban pynhun ia ka kam sain pyrthei, la pynpaw ha ka kyrwoh bad ka bynrap ba ki sienjam kiba shipor ne ka jingpynslem kan ym lah ban weng ia katei ka jingsngewkhia jong ka imlang sahlang.
Ka AICU kala buh ruh ia ki mat jingdawa hakhmat jong ka sorkar, kaba kynthup ba dei ban pynsangeh noh shi syndon ia katei ka bill, ban khmih bniah laitluid ia ka jingleh jong ka FCRA naduh u snem 2014 bad ban shim ia ki sienjam ban tehlakam ia ki kam iaumsnam bad ki jingkren shun pyrshah ia ki rit paid.