Shillong Iaiong 03: Ki paid riewngeit Khristan ha kylleng jong ka jylla Meghalaya bad ha ka ri hi baroh kawei, hynne ka sngi Thohdieng kila rakhe pyndonburom ia ka ‘Good Friday’ ne ka sngi ban kynmaw ia ka jingshah sah narphna u Trai Jisu Khrist ban iap na ka bynta ka pop jong ki khun bynriew.
Ha kane ka sngi kaba kyntang jong ki Khristan, la sakhi ba naduh ka por mynstep ki riewngeit kila leit sha ki iingmane kiba don ha kylleng jong ka nongbah Shillong ban iashimbynta shitrhem ha ki Mass Bakhuid bad ha ki jingiaseng ban kynmaw ia ka jingshah iap u khun u Blei u Jisu Khrist ha ka diengphna.
Ki khynnah haduh kiba la noh ka rta kila leit sha ki iingmane ban shakri ia u Blei bad ruh ban buh jingduwai kyrpang ha kane ka sngi kaba kyntang bad la sakhi ba bun ki iingmane kila dap smam da ki riewngeit Khristan kiba la iarwai bad ban sshah shkor ruh ia ka khubor kaba la ialap da ki nongsharai Balang.
Ki riewngeit Khristan ha ka sngi u Blei kata hadien 3 sngi, kin rakhe pat ia ka Easter Sunday kaba dei ka sngi kaba kongsan bha, ha kaba u Jisu Khrist ula mih pat na ka jingiap bad ia kane ka sngi la tip ruh kum ka Easter Sunday.
Ka Good Friday bad ka Easter Sunday kadei ka sngi kaba kyrpang bha ia ki riewngeit Khristan kiba don ha satlak ka pyrthei ha kaba u khun u Blei ula shah iap na ka bynta ki pop jong ki briew bad hadien 3 sngi pat ula im biang bad jop ia ki bor jong ka jingdum.
Haba phai sha rilum Garo ruh kane ka jingrakhe ia ka Good Friday ka long kaba iaid beit bad kaba shongkun ha man la ki iingmane jong ki Balang Khristan bapher bapher, ia kaba ki riewngeit Khristan kila iashimbynta shitrhem ha kane ka jingshakri Blei.
Wat hapdeng ka jingshit kyrang ka sngi, ki riewngeit Catholic ha ka thaiñ Williamnagar kila leit iashimbynta ha ka jingrakhe ia ka ‘Good Friday’ kaba la pynlong ha Sacred Heart Parish ha kaba kila iashimbynta lang ha kaban buh jingduwai kyrpang bad ban iashimbynta ha ka Mass Bakhuid.
