Tynruh ka Sorkar ia ka SIR ki nongthep vote, dang bishar ia jingdawa pynkylla ia ka ST Order

Shillong, Iaiong 01 : U Myntri Rangbah ka Jylla Conrad K. Sangma ha ka sngi Balang, ula ong ba ka Sorkar Jylla kan tynruh ban leh ia ka Special Intensive Revision (SIR) jong ka electoral roll haba shong bishar ia ka jingdawa ban pynkylla ia ka Constitution (Scheduled Tribes) Order, 1950, ka ban pyrrkhing ia ka jingioh jingmyntoi tang ia ki riewlum trai muluk jong ka Jylla

Haba kren sha ki nongthoh khubor, u Conrad ula ong ba ka Jylla ka kyrshan tyngeh ia ka SIR ban pynkhuid ia ki kyrteng beain na ka electoral roll.

“Kum ka Sorkar Jylla, ngi sngew dei eh ba dei ban pyntreikam ia ka SIR bad ngi kwah ban leh ia kata bad ngin sa peit ynda dei ka por, ngi laiaren bad ka Sorkar India bad ka Election Commission of India ruh kala aiktien hynrei ngim pat tip ia ka tarik kaba thikna bad kaei kaba dei ban leh hynrei kane ka dei kaei kaei kaba hap ba leh” ula ong.

Haba kylli halor ka jingdawa, u Conrad ula ong “Ngi la kren shai bad ngin pynshong nongrim ia ka na ki rule kiba ngi hap ban bud ha baroh ki ADC. Ngin hap ban khmih ia baroh ki kyndon ka riti synshar hynrei ngi la kren shai ba donkam ban wanrah la ka jong ka electoral roll”.

Halor ka jingdawa ban pynkylla ia ka ST Order ban nym ithuh shuh ia kiwei pat ki riewlum kum ki Scheduled Tribe ka Jylla, u Conrad ula ong ba ka Sorkar kam pat shong bishar bniah ia kane ka bynta. “Ia kane ka bynta ngi hap ban khmih bniah – Nga mut, ngi hap ban shong bishar bad ngam pat iohi satia ia ka. Nga hap ban iohi bad sngewthuh kadei kaei kata ka kam” ong u Conrad.

Kane ka jingkynthoh kala mih tang shisngi hadien ba ka Confederation of Meghalaya Social Organisations (CoMSO) kala dawa ia ka Sorkar Pdeng bad Sorkar Jylla ba kin pyntreikam ia ka SIR bad pynkylla ia ka ST Order, haba pynpaw ba haduh 53-54 jat ki Jaidbynriew riewlum kiba dei na kiwei pat ki jylla ka thain Shatei Lam Mihngi, kila ioh ia ka jingthuh kum ki ST ka Jylla, kaba ailad ia ki ba thied jaka, iakhun elekshon bad trei ia ki kam khaii katba ki ST ka Jylla kim ioh satia ia kum kane ka jingithuh ha ki Jylla jong ki.