Guwahati, Lber 31: U Himanta Biswa Sarma, Myntri Rangbah ka Assam ha ka sngi Ba-ar u la ong ba ka Congress kan ioh tang kumba 15-17 tylli ki seat ha ka election ban wan jong ka iingdorbar thawain ka Assam.
Haba kren sha ki lad pathai khubor, u Sarma u la ong, “Ka Congress kan ioh tang kumba 15-17 seat, ka AIUDF 5-6 seat, u Raijor Dal 1 seat ha Dhing bad ka AJP kan ioh zero. Ha Upper Assam ka BJP kan ioh ban khur jem,”.
“Mynta ki Miya na Bangladesh ki sheptieng ban ai vote ia ka Congress.Ka Congress kan nym ioh palat ia ka 20 seat ha ki election ban wan.”
U Sarma u la ong, “Ngin nym beh ia ki Muslim, hynrei ngin beh ia ki Muslim na Bangladesh. Ym don ba lah ban khang ia nga ban pynher krad ia ka iing jong ki Muslim na Bangladesh”.
U Sarma u la pynpaw ba katba ka Bangladesh ka dang don, ki jingjia jong ka jingwan rung tuh na ka thain khappud ki lah ban dang iai bteng.
U Sarma la pynpaw ba ki jingpyrshang ban tehlakam ïa ka jingwan rung be-aiñkim dei kiba la teh da ki por ba la buh hynrei ki long shi bynta jong ka jingiai bteng jong ki bor pyniaid district bad jingïada ban pynkhlain ka jingpahara.
“Kane ka jingïakhun pyrshah ïa ki nongwan buhai shnong be-aiñ kan dang ïai bteng,” ong u Sarma da kaba bynrap ruh ba ki lad jingiada jong ka jylla ki dang ïai bteng ban weng ïa ka jingeh lyngba ki lad pynjari aiñ kiba khlain.
Ka BJP ka la pynjur ia ka jingialap elekshon ha Assam bad ki khlur nongialap elekshon ki la sdang ban poi sha kane ka jylla ban pynshlur bad ai mynsiem ia ki nongtrei jong ka party.
Ka sngi thep vote ha ka jylla Assam kan long ha ka 9 tarik Iaiong ha baroh ki 126 tylli ki constituency tang ha ka wat kaba nyngkong.
