Dawa ka CoMSO ia ka SIR ka Electoral Roll bad pynkylla ia ka ST Order, 1950

Shillong, Lber 31: Ka Confederation of Meghalaya Social Organisation (CoMSO) kala dawa ba ka Sorkar Pdeng bad ka Sorkar Jylla kin pyntreikam ia ka Special Intensive Revision (SIR) jong ka Electoral Roll ban weng noh ia ki mynder beain na ka kam jied nongmihkhmat bad ban pynkylla ruh ia ka Constitution (Scheduled Tribe) Order, 1950, ka ban pyrrkhing ia ki lad jingmyntoi tang ia ki riewlum trai muluk ka Jylla.

“Ngim lah ban kyntait ia ka jingshisha ba ki don ki mynder beain ha Meghalaya bad kine ki nongwan rung tuh beain ym tang ba ki kyntur lane buhai ha ki jaka kiba dei jong ki trai muluk hynrei bun na ki, kila ioh ban iashimbynta ha ka jingjied nongmihkhmat” ong u Chairman ka CoMSO Roykupar Synrem hadien ba dep pyniaid ia ka jingialang jong ka Executive Committee ka Confederation ha ka sngi Ba-ar.

U Bah Roykupar ula ong ba ka SIR ka long kaba donkam ban “pynkhuid ia ka electoral roll” bad khanglad ia ka jingthep vote ar jaka, haba kdew nuksa ia ki nongshongshnong ha ki shnong khappud ka Assam kiba thep vote ha baroh ar Jylla.

“Ka Electoral roll kaba khuid ka dei u budlum ka riti synshar paidbah” ula sot ia ka jingkren u Chief Election Commissioner.

Halor ka ST Order 1950, u Bah Roykupar ula ong ba ka ithuh haduh 53-54 jait ki riewlum ha Meghalaya, kynthup kito kiba dei na kiwei ki Jylla ka thain Shatei Lam Mihngi, kaba ailad ia ki ban thied jaka, iakhun elekshon bad ban trei iaki kam khaii pateng khlem kano kano ka jingpyrrkhing.

“Kane kala ailad ia ki jaidbynriew riewlum na kiwei ki Jylla ban ioh ia kajuh ka hok kum ma ngi…hynrei ka long pat da pyrdet ia ki Khasi, Jaintia bad Garo ha kiwei pat ki Jylla” ula ong.

Ka CoMSO kala thoh sha ka Home Ministry bad ka Election Commission of India, haba kyrpad ban pyntreikam noh ia ka SIR bad ban pynkylla ia ka ST Order, 1950.

U Bah Roykupar u iathuh ba kin sa iakynduh ia ki seng sain pyrthei, ki khlieh nongsynshar bad ki kynhun bapher bapher ban pynsngewthuh halor kane ka kam bad ban airuh ia ka Sorkar da ka por ba kan iakren bad ka Sorkar Pdeng.

“Ngin sa thoh sha ka Sorkar Jylla ha kane ka taiew ba mynta hi ba ka dei ban shimkhia ia kane ka kam. Ngin aipor ia ka Sorkar ba hapoh katta katta ka por, kine ki kam ki dei ban poi sha ka jingiakren bad ka Sorkar Pdeng, bad ka ECI bad ki bor ba dei khmih kiba dei peit ia kine ki artylli ki kam” ula ong.

“Ngin sa thoh ruh bad iakynduh ia baroh ki seng sain pyrthei ha ka Jylla bad lyngba jong ki, kin sa iakren bad la ki jong ki MLA namar ngin ym lah ban iakynduh ia baroh 60 ngut ki MLA hynrei ngin iakynduh tang ia ki President bad Secretary jong kawei pa kawei ka party kiba don ha ka Jylla” ula bynrap.