Nongpoh, Lber 30 : Ki nong Assam kiba dei na ka Shnong Bengali Basti, kila leit thombor ia u Rangbah Shnong ka Maikhuli lem bad ki arngut ki Khun Shynrang nalor uwei pat ki Nongkitkam Shnong kum ka jingpynhiar kput ia ka jingioh thung post elektrik ka MeECL hajan ka pung dohkha ka Shnong Maikhuli, kaba don hapdeng ka jingiakajia pud.
Une u Rangbah Shnong ba shah thombor u dei uba tip kyrteng u Nicholas Marak. Arngut ki khun jong u ruh kila shah thombor lang kiba kyntnup ia u Sangwat J Sangma bad u Ricky J Sangma nalor uwei pat ki nongkitkam shnong ba kyrteng u Ajitabh Barman.
Haba iakren bad u Nicholas Marak, la iathuh ba kine ki briew na Bengali Basti kiba don da ki phew ngut, kila wan ban thombor ia u bad ia ki khun ha ka por shiteng sngi jong ka 29 tarik Lber.
U kynnoh ba kane ka jingwan thombor ka dei na ka daw ka jingkyrshan jong ka Shnong ia ka jingwan thung post elektrik dang shen ka MeECL hajan ka pung ri dohkha ka shnong Maikhuli. Ula kynnoh ba kane ka dei ka jingpynhiar kput ia ki nongialam shnong ka Maikhuli.
U Nicholas u pyntip ba kine ki briew thombor shuwa ia ki khun jong u bad hadien kane, kila bthah ia u shimet ba un wan mih sha ka jaka ba ki don bad haba ula leit ryngkat u Ajitabh Barman, kine ki briew kila thombor lang ia ki. U iathuh ba da ka jingiakhun dohiap, baroh saw ngut kila ioh ban phet krad noh na kate ka jaka.
Halor kane ka jingjia, u MLA ka Jirang Bah Sosthenes Sohtun ula bthah ia ki Pulit ka Ri-Bhoi ba kin leh eiei bad ban shimkhia ha kaban ai jingiada ia ki nongshongshnong nalor ban pynthikna ruh ia ka shongsuk shongshngain ha ka shnong Maikhuli.
Ia kane ka kam thombor la ujor ejahar ha Basistha Police Station, Assam bad ka jingtohkit mynta kala iaid shakhmat.
