Shillong, Lber 28 : U Myntri Rangbah ka Jylla Conrad K Sangma ula ong ba ka Sorkar ba ialam da ka Meghalaya Democratic Alliance (MDA) kan pynthikna ia ka jingskhem ka sain pyrthei, ka ban ailad ha ka ban buddien ia ki kam ban kynjoh ia ka thong bad ban shim ia ki rai na ka bynta ka jingmyntoi ka Jylla.
“Khlem ka jingskhem ka Sorkar, ka roi ka par kam lah ban long. Ha kine ki phra snem bala leit, ngi la pynthikna ia ka sain pyrthei kaba skhem kaba ailad ia ngi ban buddien ia ki kam ban kynjoh ia ka thong ba ngi buh bad ban shim ia ki rai na ka bynta ka jingmyntoi jong ka Jylla” ong u Conrad haba ai jingkren ha ka jingrakhe ia ka jingdap phra snem ka Sorkar MDA kaba la pynlong ha madan phutbol SRGT, Shillong ha ka sngi Saitjain.
U Myntri Rangbah ula pynpaw ba ka thong jong ka Sorkar hi ka dei beit ka jingpynkylla ia ka Jylla bad ban wanrah ia ka jingiapher kaba don jingmut ha ka jingim ki nongshongshnong bad bynrap ba ha kine ki phra snem bala leit, ka Meghalaya kala iaid lyngba ki jingeh kiba bun haba pyndonkam bha ruh ia ki kabu ban jam shakhmat da ka jingthmu bad ka jingkut jingmut.
“Mynta, haba ngi phai dien, ngi pdiang ia baroh ki jingeh ba ngi iakynduh bad ki lad ki lynti kaba ngi la shm. Da ka jingkyrshan lem ki nongialam kiba don kajuh ka jingmut bad ki paidbah ka Jylla, ngi la lah ban leh shibun kiei kiei ki ban pyntyllun shakhmat ia ka Jylla” ula ong.
U Myntri Rangbah ula ban jur ba katba ka Sorkar kam kam satia ba kala kynjoh ia kiei kiei baroh, hynrei kala buh ia ka lynti iaid kaba shai na ka bynta ka lawei. Ula pynsngew ba kane ka jingjam shakhmat kam dei u soh jong uno uno u briew hynrei ka jingpyrshang lang baroh kaba la urlong da ka jingshaniah bad jingngeit jong ki nongshongshnong ha ki nongialam.
Haba kren halor ka rukom pynroi ka Sorkar, u Myntri Rangbah ula ong ba ka roi ka par lyngba ki jingtei ka dei kaba pdeng eh jong ka jingkiew shakhmat ka Jylla.
“Ki jingkynshew pisa ba kongsan kala iaid ha man ki kam, bad 1,576 tylli ki project la pyntrei ha ri-lum Khasi bad kumba T.21,000 klur ki project ha ri-lum Jaintia. Ki project kiba heh ki kynthup ia ka jingpynroi iaki surok, ka project jingtei ha ki jaka jngohkai bad ka jingpynitynnad ia ka New Shillong” ula pyntip.
U Conrad ula pynskhem ruh ba ka Sorkar kala pynthikna ia ka jingkiew ka ioh ka kot kaba kynthup lang ia baroh bad kaba leh na ka bynta u paidbah bad pynpaw ba shibun ki skhim ka bha ka miat la pyntreikam ha Jylla ki ban ai jingmyntoi beit beit ia ki nongshongshnong kiba trei ha ki kam bapher bapher.
“Hapoh ka prokram PRIME, kumba T.32.7 klur lah dei ban sam ha kine ki san snem bala leit noh. Ki kam homestay kila ioh T.136 klur ban pynkhlain ia ki kam jngohkai bad kamai jakpoh ki trai shnong, katba T.40 klur lah kynshew ha kaban kyntiew ia ka put ka tem jong ki riew donsap” ula ong.
Haba pynpaw ba ki khlaw bad ka sawdong sawkun ki dei ki bynta ba kongsan eh ia ka Sorkar, u Myntri Rangbah ula ong “Ka jingsumar ia ka mariang ka dei ka kam ba hakhmat eh, bad T.120 klur lah dep ban bhah hapoh ka Green Meghalaya Initiatives ban kyrshan ia ki shnong ki thaw ba kin sumar ia ki khlaw”.
Haba kren halor ki prokram ha ka kam pule puthi, ula ong ba jan shilak ngut ki khynnah pule kila ioh jingmyntoi na ka Chief Minister’s Scholarship,bad ioh mar T.6000, kaba kot T.60 klur, ka prokram CM Elevate kaba la kyrshan ia ki nongioh jingmyntoi kaba kot haduh T.146 klur, bad T.56 klur hapoh ka LIFCOM kaba ai baiseng ia ki nongrep bad ki kynhun nongrep nalor ka T.50 klur ha ka kam rep syntien kaba jan kot baroh lang kumba T.500 klur ka jingkynshew na ka bynta ki skhim bala mang sha ki nongrep, ki samla bad ki Kynhun bapher bapher..
Haba pynkynmaw biang ia ki rukom treikam kiba pyniahap tarajur jong ka Sorkar, u Myntri Rangbah ula pynshai ia ka jingsngewkhia haba iadei bad ka jingpynlut ha ki tamasa bad ki jingialang. Ula pynshai ba kum kine ki prokram ki long kiba kongsan ban pynpawnam ia ka Meghalaya bad ka Shillong ha ki rynsan ka pyrthei, ka ban pynkhlain pat ia ka kam jngohkai bad ki kam kamai jakpoh. Kine ki jingpyrshang kim dei kiba la leh ha ka jingduhnong ki nongrep, ki samla pule lane ha ka liang ka koit ka khiah”.
U Myntri Rangbah bad ki kynrem ki lyndan kila san ruh ia ki cheque ba T.6.04 klur hapoh ka FOCUS+ (bala sam sha ki 1.05 lak ngut ki nongioh jingmyntoi kiba rim bad ba thymmai), ka Green Meghalaya +-T.24.54 klur (bala sam sha ki 5994 ki nongioh jingmyntoi), ki cheque bad work order hapoh ka CM Elevate ba T.76 lak sha ki nongsengkam bad T.18.47 klur ka jinglut na ka bynta ki 55 tylli ki warehouse bad 4 tylli ki CFC, T.27 klur ka LIFCOM sha ki 627 tylli ki Cooperatives, T.30 klur na ka MegLife sha ki 128 tylli ki Community Hall bad T.22 klur hapoh ka Floriculture sha ki 320 ngut ki nongioh jingmyntoi.
U Myntri Rangbah ula pynkup burom ruh ia ki 37 ngut ki Rangbah Shnong haba ai jingithuh ia ka kam nongialam jong ki hapoh ka Greem Meghalaya prokram. 128 tylli ki Community Hall hapoh ka MegLife bala kyrshan da ka JICA bad 34 tylli ki Warehouse bad Common Facility Centre hapoh ka CM Elevate lah plie lyngba ka kor digital da u Myntri Rangbah ha kane ka sngi.
Kiba iadonlang ki kynthup ia u Myntri ka Tnad Jngohkai bad Nongrep TD Shira, u MLA ka Umsnig bad Chief Whip ka Sorkar Dr C Lyngdoh nalor ki Ophisar bad ki nongioh jingmyntoi jong ki skhim bapher bapher kiba dei na ri-lum Khasi bad Jaintia,
 kan pynthikna ia ka jingskhem ka sain pyrthei, ka ban ailad ha ka ban buddien ia ki kam ban kynjoh ia ka thong bad ban shim ia ki rai na ka bynta ka jingmyntoi ka Jylla.){kind=link}