Shillong, Lber 27 : U Myntri Rangbah ka Jylla Conrad K Sangma ha ka sngi Thohdieng, ula pynlait paidbah ia ka Mission 1000, ka prokram ban pynduh jait ia ka jingduna ka jingioh jingbam tei met bad pang swai hapdeng ki Khynnah ha Meghalaya.
“Haba ngi lehkmen halor ka bam, Nga kwah ban leh eiei halor kane ka kam kaba nga kwah eh ban leh naduh ka mynsiem. Ka Jylla jongngi ka mad shibun ki jingeh ha ka koit ka khiah, ka pule dangle bad ka jingbam tei met. Ka jingduna ka jingioh jingbam teimet bad pang swai hapdeng ki Khynnah ka dang long ka jingsngewkhia kaba jur” ong u Conrad haba plie ia ka tamasa bam (Culinary Cascade) 2026 ha Nan Polok hynne ka sngi Thohdieng.
“Ban tehlakam ia kane, Ngan pynlait paidbah ia ka Mission 1000, ka prokram bala buh da ka thong ban pynduh jait ia ka jingduna ka jingioh jingbam tei met bad pang swai ha Meghalaya” ula bynrap.
Ka Mission 1000 kan phaikhmat ha ka jingpeit thuh ia man ki khynnah naduh ba dang kha, ban pynioh iaki jingbam tei met, bad ka jingpyndonkam ia ki technology na ka bynta ka jingpeit bniah ba khlem sangeh.
U la batai bniah, “Nga pyrkhat ban pyniasoh ia kane ka thong bad ki marbam mardih jong ka thain. Ki nongshet jingshet, ki restaurant, bad ki hotel jong ngi ki lah ban shim ia ki shnong ne ki distrik, ban kyntiew ia ki jingbam ba la thung hi ha ka thain, ki jingbam ba tei met bad ban thaw ia ki prokram kiba kynthup ia ki shnong ki thaw bad ki jingthmu jong ka CSR. Da kaba pyniasoh ia kane bad ka Culinary Cascade, ngi lah ban leh eiei ia kane ka jingtynjuh ba mad da ka imlang sahlang haba ngi lehkmen iala ka jong ka kolshor bad ka bam ka dih”.
Kane ka tamasa ba ar sngi, kaba la pynlong halor ka matpdeng “Crafted for all 5 Senses”, la pynlong ha ka 27-28 tarik 2026 bad la pyniaid ia ka da ka Tnad Tourism ka Sorkar Jylla ha ryngkat ka jingiatrei lang bad ka Meghalayan Age Ltd, MyMeG bad ka Chief Minister’s Meghalaya Grassroots Music Program.
Haba ai jingkren, u Myntri Rangbah ula ai khublei ia ka Tnad Tourism b aka pynlong ia kane ka tamasa.
Ula ong “Ha kine ki laisnem bala leit, ka tamasa kala nang itynnad shuh shuh, kaba la nang plie ia ki lad ki kabu ia ki nongshet jingbam, ki kynhun ba don bynta ha kane ka kam bad kham kongsan eh, ki samla jong kane ka Jylla ba itynnad jong ngi”.
Haba batai bniah ia ka jingshimkhia ka Sorkar ia ki tamasa, ula pynpaw “Ngim shym la leh ia kiei kiei kiba thymmai, ngi la leh pher ia kiei kiei. Bun na kine ki tamasa kila don ha ki snem bala leit noh hynrei ngi la pynjlih shuh shuh ia ki, pynlong ia ki ba kham biang, bad pynthikna ba kin iaid man u snem. Ha kine ki phra snem bala leit, ka Meghalaya kala buh ia ka buit treikam kaba shai ha ka liang ka kam jngohkai : ban pyni sha ka pyrthei ia kaba bha tam jong ki briew jong ngi, pynbeit ryntih ia ka ha ka rukom ba don jingmut bad pynthikna ba kin iai bteng”.
Haba kren ia ki tamasa bala dep, u Myntri Rangbah ula ong “Dang mynta ka janmiet, Nga la plie ia ka Indian Sailing League ba nyngkong eh ha Umiam, kaba la wan iashimbynta da 182 ngut ki nongking lieng na ki 8 tylli ki ri bad 14 tylli ki kynhun-kaba pynlong ia ka kum kawei na ki jingiakop king lieng kaba heh bha ha India. Dang khyndiat sngi, ngi la plie ia ka Shillong International Film Festival ba nyngong eh, kaba wanrah ia ki nongshna phlim bad ki artist na kylleng ka Ri. Ka kynhun nongrwai ka ri Bilat Def Leppard ka dang shu dep tam dang shen bad mynta ka miet, u Russel Peter un pynbyrngia ia ki paidbah ha Shillong”.
Kiwei pat kiba la ai jingkren ki kynthup ia u Vijay Kumar D., IAS, Commissioner and Secretary, ka Tnad Tourism, u Chef Ahmedaki Laloo, Festival Curator na ka A’ Origins bad kiwei kiwei.
