Nongpoh, Nailur 26: Ka Joint Action Committee-Against Casino (JAC-AC) kala rai ban pynlong noh da ka jingiatur paidbah na Nongpoh sha Secretariat ban dawa ia ka Sorkar Jylla ba ka dei ban pyndam noh ia ka jingthmu ban wanrah ia ki ktem khalai Casino ha Ri-Bhoi bad ban pynduh pyndam shisyndon ia ka ain Gaming Act, 2021.
Ka JAC-AC kala shim ia kane ka rai ha ka jingialang ba long hynne ka sngi nyngkong ha Nongpoh, kaba la wan iashimbynta da ki Nongmihkhmat ka Ri-Bhoi ba kynthup ia ki MLA, MDC, ki Nongialam Niam, ki Longkmie, ki Samla, ki Rangbah Shnong bad ki rangbah ba pawkhmat jong ka them Ri-Bhoi.
Ka JAC-AC kala lum ia kane ka jingialang ban iatai sani halor ka jingthmu jong ka Sorkar bad ban sngap ia ka sur jong uba bun balang.
Baroh ki Nongiashimbynta kynthup naduh ki MLA, MDC kila ai jingmut ba dei ban ieng pyrshah beit ia ka jingthmu jong ka Sorkar bad ban dawa ia ka Sorkar ba kan pynsangeh noh ia kane ka jingthmu da kaba pynmih shisyndon ia ka jingpyn bna.
Ka JAC-AC kala shim ia ka rai ban leit iakynduh biang ia u Myntri Rangbah ka Jylla bad ban aiti ia ka dorkhas ba dei ban pynduh noh ia ka ain Gambling Act, 2021 ia kaba la mynjur da ka Iingdorbar Thaww Ain ka Jylla myn ha ka 26 tarik Lber 2021.
Nalor kane, la rai ruh ban pynlong da ka jingia iaid paidbah kaba heh ha kaba ki paidbah na Ri-Bhoi kin iamih ban leit tur sha Secretariat ban pynbor ia ka Sorkar ba kan sngap ia ka sur jong u paidbah.
Ki Nongmihkhmat paidbah ba wan iashimbynta ha ka jingialang ki kynthup ia u MLA ka Nongpoh Bah Mayralborn Syiem, MLA ka Umroi Bah George Lyngdoh, MLA ka Jirang Bah Sosthenes Sohtun, MDC ka Nongpoh Bah Balajied Rani, Bah BB Makdoh, Chairman JACAC uba dei ruh u Chairman ka Synjuk Ki Rangbah Shnong, U bah Ferdinald Kharkamni, Secretary JACAC, uba dei ruh u President ka KSU NKHD bad kiwei kiwei.
