Shillong, Lber 23 : U Myntri ka Tnad Pule Puthi Lahkmen Rymbui ha ka sngi Nyngkong, ula pyntip ba ka jingpynshisha ia ki nonghikai SSA bad Adhoc kala iaid mynta ha baroh kawei ka Jylla, ka ban plie lynti ia ka jingsiew ia ka tulop bala pynbeit ryntih naduh ka 1 tarik Iaiong, 2026.
“Ka sienjam ban pynshisha..ka dang iaid mynta ha baroh kawei ka Jylla” ong u Bah Rymbui haba iakren bad ki nongthoh khubor, haba pynpaw ba ka West Garo Hills kala plie ia ka jaka ba kyrpang ban pyniaid shakhmat ia kane ka kam wat hapdeng ka jingthut kaba mih na ki jingkulmar dang shen.
Ula pyntip ba ia kane ka kam pynshisha yn sa pyndep noh hapoh ka artaiew. ‘Ka Sorkar kala kut jingmut hok ba ka tulop bala pynbeit ryntih kan sdang treikam noh naduh ka 1 tarik Iaiong, 2026” ula bynrap.
Haba kylli ia ka jinglut, u Bah Rymbui ula ong ka Sorkar ka shim ia ka kum ka jingkynshew haka jaka ka jingpynlut. “ Ngi la pyrshang ban ai ia kaba bha tam sha ki khynnah skul, ngi hap ban kynshew”.
Ula pyntip ia ka jingpynlut sa T.220-250 klur- ha ka jingsiew ia kane ka tulop thymmai ka ban kot baroh lang sha ka T.850 klur- kaba shong ruh kat kum ka jingdon ki nonghikai hadien bala dep ban pynshisha lut ia baroh.
U Bah Rymbui ula iathuh ba ia kane ka jingsiew ba thymmai yn pyniaid kat kum ka jingshakri slem.
U Myntri ula pynpaw ia ka jingsngew skhem ba kane ka jingsiew thymmai kan ai mynsiem ia ki nong hikai ba kin nang trei kham bha bad ong “Ki nonghikai haba ki ioh tulop ba duna, kila trei shitom bad mynta…kin nang trei shitom shuh shuh”.
