Shillong, Lber 19: U District Magistrate ka West Garo Hills u la pynjari da ka korphiw miet ba khlem pud naduh ka por 6 baje janmiet haduh ka por 6 baje mynstep ha baroh kawei ka district da kaba kdew ba ki don ki jingjia thombor bad ki jingma ia ka jingshngain jong ki paidbah.
Ha ka hukum ba la pynmih katkum ka kyndon 163 jong ka Bharatiya Nagarik Suraksha Sanhita, u District Magistrate Vibhor Aggarwal u la ong, “Hadien ba la bishar bniah ia ka jinglong jingman bad ki kaiphod ba la ioh na ki bor pynjari ain, nga sngewhun ban pynbna ba ka long kaba donkam kyrkieh ban bteng ia ki lad jingiada ba pyrkhing bad ban iada na ka jingshah thombor”.
Ka korphiw miet kan treikam haduh ban da mih da kiwei pat ki hukum.
Ka hukum ka la bthah ba ym bit ban ïaid shabar jong ki iing ki sem haka por pynjari korphiw.
“Kino kino kiba pynkhein ia kane ka hukum kan khring ia ka jingshah pynshitom katkum ka kyndon 223 jong ka Bharatiya Nyaya Sanhita bad kiwei kiwei ki kyndon ain” la ong ka hukum.
Ka hukum ka la bthah ia baroh ki bor jong ka ain, ki executive magistrate bad ki ophisar, ki pulit ban pyntreikam tyngeh ia katei ka hukum bad ban leh ia kaba donkam pyrshah ia kino kino kiba pynkhein ia ka korphiw.
