Shillong, Lber 18: U Myntri ka tnad Information and Public Relation Bah Lahkmen Rymbui, ula pynbna ba ka Jylla Meghalaya kan pynlong ha ka sien ba nyngkong eh ïa ka Shillong Film Festival naduh ka 25 27 tarik u Risaw ha State Convention Centre, haba pynpaw ba yn pynlong ia ka da ka Directorate of Information and Public Relations (DIPR).
“Kane ka dei ka jingsdang jong ka lynti iaid namar shibun kiei kiei kin hap ban bud hadien kane” ong u Bah Rymbui haba iakren bad ki nongthoh khubor ha ka sngi Balang, haba pynpaw ia ka jingwan ia shimbynta ki nongshna phlim na kylleng ka thain Shatei Lam Mihngi, kiwei ki Jylla bad nabar ri ruh kumjuh.
Ula ong ba kane ka tamasa ka thmu ban pyni ia ka kolshor ka Meghalaya, ka jinglong ki jaka bad ki jaka jngohkai bad kan ai ka lad ia ki samla trai Jylla ban ioh jinghikai na ki Director jong ki phlim kiba dei nabar ka ri.
U pyntip ba kan don ruh ka workshop halor ka jingshna phlim bad ban leh editing, ka ban iaid ryngkat ryngkat bad ka screening ia ki phlim.
U Bah Rymbui ula pynpaw ba ka Khasi cinema kala sdang la palat 40 snem mynta da ka phlim Laiphew Syiem bad ka phlim Manik Raiting ha u snem 1980, haba ong ba ki nongpynmih phlim Khasi, Garo bad kiwei ki Ktien ki dei hok ban ioh ia ka jingkyrshan.
Ula pynpaw ruh ba ia ka phlim “Ha Lyngkha Bneng” jong u Bah Pradip Kurbah uba la ioh khusnam dang shen, ka phlim Garo “Chanchisoa” bala direct da ka Elvachisa Ch Sangma bad Dipankar Das bad ka phlim Ka Chithi ba pynmih da ka kong Simi Khongthiang, kin dei napdeng ki phim ba pynmih h ki trai jylla ki ban sa pyni ha kane ka tamasa.
Haba buh ia kane ka tamasa kum shibynta jong ka mishon u Myntri Rangbah ban plie ia ka lad ka lynti na ka bynta ki samla, u Bah Rymbui ula kyntu ia ki samla ba “Kin wan bad sakhi bad pyntbit ialade ha ka rukom shna phlim” haba bthah ia ki Ophisar ka DIPR ba kin pynthikna ia ka jingpyniaid beit iaid ryntih khnang ba yn lah ban pynlong biang ia kum kine ki tamasa ha ki snem ban dang wan.
.){kind=link}