Guwahati, Lber 17: U Myntri Rangbah ka jylla Assam Himanta Biswa Sarma ha ka sngi ba-ar, u la pyntip ba ka BJP kan pynieng kyrtong tang ha ki 89 tylli ki constituency na ki 126 tylli ki constituency ka iing dorbar thawain, kaba sah sa 26 tylli ki jaka na ka bynta ka paralok jong ka.
Haba kren sha ki lad pathai khubor u Sarma u la ong, “Ka BJP, kaba la bat ia ka bor synshar ha ka jylla naduh u snem 2016, kan pynieng kyrtong tang na ki 89 tylli na ki 126 tylli ki constituency jong ka jylla, bad kan sah sa 26 tylli ki seat na ka bynta ka paralok jong ka, ka Asom Gana Parishad (AGP) bad kiba sah 11 tylli sha ka Bodoland Peoples Front (BPF).Ka AGP ka lah ban pynbna kyrtong ha ka sngi Balang.
U Sarma u la ong ba ka BJP kan sa pynbna ia ki kyrteng jong ki kyrtong jong ka hadien ka jingialang jong ka party’s parliamentary board ha ka 18 tarik u Lber.
“Ka jingialang jong ka committee elekshon ka BJP ka la iakren ia ka thup kyrteng jong ka BJP bad kumjuh ruh ia ka jingpynbeit ban iasam constituency bad ki paralok ba iatreilang jong ngi.Ka BJP central parliamentary committee kan iakynduh ha ka janmiet jong ka sngi Balang hadien kata ngin sa pynmih ia ka thup ha kajuh ka janmiet lane ha ka step jong ka sngi Palei,” la ong u Sarma.
Ka jingthep vote ia baroh ki 126 tylli ki constituency ha Assam kan long ha ka wat ba nyngkong ha ka 9 tarik Iaiong bad ka jingniew kan long ha ka 4 tarik Jymmang.
