Shillong, Lber 17: Ki Ophisar Sorkar, Scientists bad ki Nongrep kila iakynduh lang ha MAMETI, Upper Shillong hynne ka sngi Baar, ban iapyrkhat ia ki buit rep khlem ki tiar ka juk mynta ne Natural Farming, ha kaba kila don 79 tylli ki Clusters, palat 9,100 ngut ki nongrep kiba la pynrung kyrteng bad ka jylla ka don ia ka thong ban rep khlem da pyndonkam dawai ne Organic Farming ha ka jaka kaba 100,000 Hektar hapoh u snem 2028.
Ka Regional Conference on Natural Farming, kaba la pynlong da ka Regional Centre for Organic & Natural Farming (Imphal) bad MEGNOLIA, kala buh hakhmat ia ka Natural Farming kum ka bynta kaba kongsan ha ka imlang sahlang bad ka ioh ka kot jong ka jylla Meghalaya.
Ka Bansara Mylliemnagap, Director jong ka Horticulture, kala ong ba ka rukom rep kaba rim ka ai ka jingmyntoi ia ka jylla. “Ka jingpynkynriah ka wanrah ia ka koit ka khyndew, ka pynduna ia ka jinglut jingsep bad ka pynioh ruh ia ka dor kaba biang ha ki iew ki hat na ka bynta ki nongrep”. Kala kyntu ba dei ruh ban pyniasoh lang bad ki kam ri jingri hapoh jong ki Clusters bad ban wanrah lang ia ki nongrep kiba dang samla sha kane ka prokram.
U Maqbool Lyngdoh Suiam, Chief Administrative Officer ka MEGNOLIA, ula batai shaphang ki buit treikam jong ki kynhun ka jylla ha kaban ai jinghikai, ban ai iaki syrnod bad ban pyniasoh bad ki iew ki hat na ka bynta ki jingthung kiba kongsan bad remdor bad ka bynrap “Ngi don ia ka thong ba hapoh u snem 2028 ngin ialeh ban poi sha ka jingkynjoh sha ka 1 lak Hektar kaban dei na ka bynta ka Organic Farming.”
U Dr. V.Y. Deoghare jongka RCONF Imphal ula batai shaphang ka jingiaid shaphrang ka ri na ka Bio‑Fertilisers sha ka National Mission on Agricultural Farming bad ka pynpaw ba ka sorkar pdeng ka buh thong bad kan shong ruh ha ka jingpyntreikam ha ki shnong ki thaw.
Joint Director, Lucky Diengdoh la pyntip ba ka Meghalaya Clusters ka kynthup ia ka jaka kaba 3,950 hektar—92% jong ka jingbuh thong jong ka jingpynrung kyrteng, ka jingleh ia ka Soil Testing kaba la kot 89% bad la sam ruh ia ki Health Cards.
Ha ka bynta jong ka jingiatai bad jingiasyllok la pyniaid da u C.S. Shabong, Director ka Agriculture (RTTI), ha kaba la iakren halor ka jingpynjyrngam kaba baroh shi snem, ki jait jingthung ki bapher bapher bad ki bynta kiba iadei bad ka Cost‑Cutting Techniques.
U Chief Operating Officer ka MSRLS u Bah Shanlang Lyngdoh ula batai shaphang ki SHG kiba la ialam da ki kynthei, ki skul na ka bynta ki nongrep, Community Seed Banks, BRDC.
Ka Kong Sophie Majaw kala ai ia ka jingbatai kaba bniah halor ka jingai jinghikai ha kaba iadei bad ka kyrdan jong ka jingrep khlem pyndonkam dawai, katba u nongrep u Ratnesh Sharma na Chhattisgarh ula sam ia ki jingtip halor ka jingpynlut duna, ka jingiohnong kaba bun ha kaba iadei bad ki siej, u pai bad u kba.
Ha kane ka jingialang la pynkup burom ia ki nongrep na kylleng ki district, kiba kynthup ia u Bah Khalainbhon Jolang, Ringtone Nongspung (Ri Bhoi), Balari Lyngkhoi, Brijita Marbaniang (South West Khasi Hills), Sinolin Thongni, Airis Lyngkhoi (West Khasi Hills), Dalajied Lyngkhoi (Eastern West Khasi Hills), Amity Kyndait, Solda Phawa (East Jaintia) bad Aroma Talang (West Jaintia) halor ka jingtrei shitom ka jongki.
Kane ka jingialang ka long ruh kum ka jingkieng kaba pyniasoh ia ki polisi treikam bad ka rukom leh hapoh ka jylla Meghalaya kaba thrang ban jam sha ka rukom rep rukom riang kaba khlem pyndonkam ia kino kino ki dawai dashin.
