-Mike K Raswai
Shillong, Lber 15 : Katno ngut na ngi kiba la ioh sakhi dala ki jong ki khmat ia ka lympung iakop mareh ki kulai lait noh ka jingiohi na ki phlim Hollywood ne Bollywood ruh kumjuh. Hynrei kane ka jingialehkai shisien ka por, ka dei kaba la pawnam bha ha ri-lum Khasi hynrei kala shu jah rngai dang 28 snem mynta – ia kaba la pynkhie im pat ha une u 2026 da ka jingmih shakhmat kawei ka Seng ki Nongrep ban pynlong ia ka lympung ialehkai.
Kane ka seng ka dei ka Ka Ïatreilang Farmers Producer Organisation (ÏFPO) kaba dei na ki thain Mawsadang, East Khasi Hills, kaba jngai tang hapoh 50 km na Shillong. Kane ka seng kala pynlong ia kane ka lympung iakop mareh kular ha ka sngi Saitjain (14tarik Lber) ha shnong Mawsadang, kaba la wan iashimbynta da ki nongri kulai na kylleng ki thain ka Jylla.
Ka jingiakop pynmareh kulai ha Mawsadang ka dei kaba la don la slem bha bad kane ka thain kaba ker sawdong da ki lum phlang ba jyrngam, ha ka por ba kam pat ioh surok, ka dei ka thain kaba ki paid nongshongshnong ki ju ri ia ki kulai ban pyndonkam ha ka leit ka wan bad ka kit ka bah, ka leit iew leit hat, leit siew leit tda.
Hynrei da ka jingwan poi ka surok sha ka thain bad ka jingduna ki nongri kulai, lah pynkut noh ia kane ka jingpyniakop ha u snem 1998. Hynrei kaba sngewtynnad ka long ba mynta u snem 2026, ka kynhun IFPO kala sdang ban pynkhie im biang ia kane ka jingialehkai bad ki paidbah mynta ki ioh biang ka lad ban sakhi biang ia kane ka jingialehkai ba phyla.
Kine ki kulai kiba poi shim bynta ha kane ka jingiamareh kidei kiba la ri bad sumar hi da ki briew kiba dei napoh ki district bapher bapher jong ka jylla bad kine ki kulai kim pat ioh ruh ka jinghikai pyntbit kumba long sha kiwei ki jylla ne ki ri ka pyrthei, hynrei tang ka jinghikai beit na ki trai ba ri ia ki.
Kane ka jingialehkai ban pynmareh kulai ka long kaba pher bad kaba kham phyla namar ba kham ñiar ban lap ne shem ia kum kane ka jingialehkai ba pynmareh kulai.
Ki paidbah na kylleng ki jaka kiba iatip shaphang kane ka jingiakop mareh kulai, kila poi sha Mawsadang ban sakhi da la ki jing ki khmat ia kane ka jingiamarehki kulai kaba kim pat ju iohi koit lait noh tang ha ki phlim hollywood.
Haba phai sha kane ka jingialeh kai ki nongjop ki ba la ioh pdiang ia ka khusnam ha ka kyrdan kaba nyngkong la ioh pdiang da u Bah Brendingland uba dei na New Mawjai, ba-ar la ioh da u Bah Banjoplang na Byrki bad ha ka kyrdan ba lai la ioh da u Bah Pynshaibha na Laitlum kiba la ioh pdiang da ka khusnam song pisa.
