Shillong, Lber 13 : Ki Pulit ka Jylla kila ioh kem ia hynriew ngut ki briew, kynthup arngut ki nongialam ba hakhmat (kingpin) na Haryana, halor ka jingdonkti ban kyndang ia lai tylli ki kor ATM na East Khasi Hills bad ioh rong tuh ia ka pisa ba jan kot T.1 klur.
Haba kren sha ki lad pathai khubor ha ka sngi Thohdieng, u Superintendent of Police ka East Khasi Hills Bah Vivek Syiem, ula iathuh ba kine ki runar ki dei kiba kyndang ia ka ATM ha Mawkriah, Smit bad Mylliem.
U iathuh ba ka kynhun Special Cell kala lapdien ia u Salim (36) bad u Rahul (31) sha Nuh District bad la leit ban kem ia ki ha ka 10 tarik Lber. Hadien kane la kem sa ia arngut ki Khasi kiba iarap na Shillong. Kine ki Khasi ki kyrteng u John Fiscal Lyngkhoi ba sah ha Umpling bad u Joyous Dura ba sah ha Mawlai Nongkwar.
Kine ki hynriew ngut kila kyndang ia ka ATM ha Mawkriah ha ka 21 tarik Jymmang 2025 bad ioh rong tuh haduh T.28.13 lak, ka ATM ha Smit ha ka 30 tarik Nohprah 2025 bad ioh rong tuh T. 35.57 lak lem bad ka ATM ha Mylliem ha ka 8 tarik Rymphang 2025 ba ioh rong tuh T.35 lak.
Kine ki runar kila leit kyndang ia man ki kor ATM tang hapoh 7 minit kaba long da ka por bala buh kumba ju leh ki shipai. “Ngim pat ju iohi ia kum kine ki runar kiba tbit ban lute sted bha iaki ATM” kynthoh u bah Vivek.
Hadien ba register lai tylli ki case- 2 tylli ha Mawngap bad kawei ka Madanrting, ka kynhun ba 7 ngut ki Pulit Special Cell kila leit sha Haryana ha ka 27 tarik Rymphang bad da ka jingiatreilang bad ka Central Investigation Agency (CIA) ka Nuh District, ka kynhun kala ioh kem ia u Salim bad ia u Rahul bad hadien kila kem sa ia u Join F Lyngkhoi bad Joyous Dura na Shillong.
“Kine ki briew ki dei kba la shah thwet ha kiba bun ki kam kyndang ATM hapoh ka ri” ong u Bah Vivek haba pyntip ba ka Iingkashari kala aibor ban set san sngi hapoh ka police custodu ia u Salim bad Rahum bad hynriew sngi ia u John bad u Joyous.
Ka jingthwet ia ki runar kyndang ATM kala lam ruh sha ka jingioh kem sa arngut ki runar na Assam.
“Ha ka 12 tarik Lber, sa kawei ka kynhun ba ialam da u DSP (Crime) kila leit sha Asam. Ka kynhun kala kem ia u Rijol Garim (38) na Jakhla, Bongaigaon District bad hynnin ka miet, kila kem sa ia u Lius Ali (28) na Boragaon kaba hap hapoh ka Gorchuk Police Station” iathuh u SP haba bynrap “Ngi la lap ruh ia ki sakhi ba donkam pyrshah ia kine ki briew”.
U Bah Vivek u pyntip ba ka jingtohkit ka dang bun bad ka dang iaid mynta ban kem shuh shuh ia ki runar kiba la phetrieh.
Haba kylli, u SP ula iathuh ba ki arngut kiba kem na Shillong ki dei ki nongialam lynti bad ki dei ruh kiba ju donkti ha kiba bun ki kam bymman ha ki por bala leit noh.
U iathuh ba kine ki arrngut ki dei ruh kiba la donkti teng ha ki kam khaii droks bad pyniap briew bad kiwei ki kam bymman.
Haba kylli la u Joyous Dura u dei uba don jingiadei bad uwei u nongthaw ain ka Jylla, u Bah Vivek ula jubab “Ngam tip ia kata. Iano ba ki don jingiadei kane kam dei shibynta na ki kyndon jong ka jingtohkit”.
Lah ban kdew hangne, ba ki paidbah ba don kumba 30 ngut kila thombor ia ki Pulit ka Jylla da ka jingpyrshang ban pynlait ia u Rahul ha Nuh District, kaba la pynbor ia ki Pulit ban siat da ka suloi. Kane kala jia ha ka 10 tarik Lber.
Halor kane ka jingjia, u pyntip ba ki Pulit ka Haryana kila register case bad dep ithuh ia 12 ngut na kine ki nongthombor.
U SP ula bynrap ba ki nongtohkit kim shym la shem ia ka jingdonkti ki nongtrei Bank ha ka jingshah kyndang kine ki ATM.
