Shillong, Lber 12: U District Magistrate ka West Garo Hills u la pynjlan ia ka korphiw ha baroh kawei ka District namar ka jinglong jingman hapoh ka district kam pat ishngain bad namar la ioh jingtip ba dang don ki jingjia thombor kiba dang jia thymmai kiba pynthut ia ka shongsuk shongsain jong ki paidbah.
Katkum ka hukum ba la pynmih da u District Magistrate u Vibhor Agarwal, korphiw bala pynjari katkum ka kyndon 163 jong ka Bharatiya Nagarik Suraksha Sanhita (BNSS), kan treikam naduh ka por 12:00 baje mynstep jong ka 13 tarik haduh ka por 6:00 baje mynstep jong ka 14 tarik Lber, tang haduh ban weng iaka hukum.
Ha kane ka por pynjari korphiw, yn ym shah ïa ki nongshong shnong ban mih shabar na ki ïing ki sem hapoh u pud u sam jong ka West Garo Hills district.
Hynrei ka bor synshar district ka la pynbna ban pynlait saw kynta ia ka korphiw naduh ka por 9:00 baje mynstep haduh 1:00 nohphaisngi ha ka 13 tarik u Lber, kum ka jingailad ïa ki nongshong shnong bakin thied ïa ki marbam mardih bad ki mar ba donkam.
Ka hukum ka kdew ba baroh ki jaka pule, ki bank, ki jaka khaii, ki iew ki hat, ki ophis bad kiwei kiwei kin dang khang ha kane ka por ba pynjari korphiw. Yn shah ban plie tang ki jingshakri kiba kongsan, kynthup ïa ki hospital, ki dukan die dawai, bad kiwei ki jingshakri ba kyrkieh ki ba la ai jingbit kyrpang da ka bor district.
La bthah ia ki bor jong ka ain, ki Executive Magistrate bad ki heh pulit ba kin pynjari tyngeh ia kane ka korphiw bad yn sa leh daka ba tyngeh ia kino kino kiba lap ba ki pynkhein ia ka hukum katkum ka Section 223 jong ka Bharatiya Nyaya Sanhita bad kiwei kiwei ki kyndon ain.
