Shillong, Lber 04 : Ka Garo Students’ Union (GSU) kala pynbna ia ka rai ban pynlong ia ka Non-Cooperation Movement ba 24 kynta ha ka 6 tarik Lber ban pynbor ia ka jingtreikam ka syrnot Scheduled Tribe ha ka elekshon GHADC ha baroh 29 tylli ki constituency, ka ban long la 10 tarik Iaiong.
“Ngi kyntu ia baroh ki para Garo shynrang bad kynthei ba kin sngewthuh ba kane ka sienjam ka long ba iada ia ka khyndew jong ngi, ka kolshor bad ka deiti tynrai” ong u President ka GSU Tengsak Gabil Momin ha ka kyrwoh.
Ula kyntu ia ki bar jylla ba kin ym iashimbynta ha ka elekshon GHADC bad kiar na ka jingthep kyrteng kum ki kyrtong haba pynksan ba tang ki riewlum ki dei ban iakhun ia ka elekshon hapoh ka Sixth Schedule.
Une u Nongialam ka GSU ula kyntait ia ka jingkam u Myntri Rangbah ka Jylla Conrad K Sangma ba ong ba ka jingdonkam ia ka syrnot Scheduled Tribe ha ka elekshon GHADC kadei ka kam kaba kyllain bha, bad ong ba ka dei tang ka buit politics.
“Ka dei ka voke bank bad ka jingialehkai nombor” ong u Momin haba kyntait ruh ban pdiang ia ka jingkren jong u Timothy Shira ba ka dei ka kam kaba la jia teng da kaba ong “ki kyntien kum kaba la jia teng bad kaba ju leh kim dei satia ki rule. Kane ka pyntroin ia ka 6th Schedule”.
U Momin ula dawa ia ka Sorkar Meghalaya ba kan iasyllok bad u Lat ka Jylla bad ban pynkylla ia ka Rule 128 na ka Gazette Notification. Ula pynpaw “Ka jingbym leh eiei kan dei ka jingshet kylla ia ka bha ka miat ki Garo”.
Ka GSU ka dawa ba ka Autonomous District Council kadei ban don noh la ka jong ka Electoral Roll bad ka jingtreikam kaba lait na ki jingtuklar ka Jylla, haba ban jur ba dei ban burom ia ki Rules ka Council ba iada ia ki riewlum khlem da pyntreikam ia ka paragraph 12 (a) ban pyniap ia ki.
Kala tyrwa ruh ban pynkylla noh ia ka paragraph 12(a) bad ka riti synshar ba kan kynthup ia u Chief Executive ki ADC ha ka Governor Council of Ministers bad ka Tnad District Council Affairs ban lah iada khambha ia ki riewlum.
Ka GSU ka ong ba ka jingailad ia ki bar jylla ba kin thep vote bad iakhun ia ka elekshon naduh u snem 1952 kadei ka jingpynkhein ain kaba shai kdar.
Ula pynpaw ba ka GSU kala pyrshah ia kane ka kam lah shiphew snem tam, kumjuh ruh ha u 2007 bad ha u 2008 ban weng noh ia ki kyrteng jong ki bar jylla na ka electoral roll ka GHADC. Hadien kane la pynbud da ka boycott ia ka elekshon GHADC (2015,2021) bad ka elekshon Municipal (2010).
“Kam pat ju don ka elekshon Municipal hangne namar ki paid Garo ki pyrshah ia ka jingiashimbynta jong ki bar jylla” ula ong.
 kala pynbna ia ka rai ban pynlong ia ka Non-Cooperation Movement ba 24 kynta ha ka 6 tarik Lber ban pynbor ia ka jingtreikam ka syrnot Scheduled Tribe ha ka elekshon GHADC ha baroh 29 tylli ki constituency, ka ban long la 10 tarik Iaiong.){kind=link}