Shillong, Lber 02 : U MDC barim ka 17-Balachanda Constituency, Sofior Rahman ula kynthoh ba ym don kawei ruh ka kynhun kaba lah ban kam trai kyrpang halor ka synshar paidbah ha ri-lum Garo, haba pynpaw ba ka thain ka dei jong baroh ki briew bala ioh ia ka hok ban shongshnong bad bala im la sah da ki phew snem.
Kane ka jingkynthoh ba tyngeh u Rahman kala wan kum ka jubab ia ka jingkynthoh ba dang shen jong u MDC Rinaldo K Sangma haba iadei bad ka jingdonkam ia ka syrnot Scheduled Tribe (ST) ban iakhun ia ka elekshon Garo Hills Autonomous District Council (GHADC).
Ha ka kyrwoh bala pynait ha ka sngi Nyngkong, u Rahman ula ong ba ka long kaba donkam ban buh “jingthoh ia katto katne ki jingshisha kat kum ka riti synshar” ba iadei bad ka bor bad u pud jong ka GHADC hapoh ka Sixth Schedule jong ka Riti Synshar ka Ri.
Haba pynshai ia ka nongrim kat kum ka riti synshar, ula ong ba katba ka Sixth Schedule ka ai ia ka jingsynshar ba laitluid ia ki Autonomous District Council ban iada ia ki riti dustur, ka khyndew ka shyiap bad ki jingleh tyrnai, kam shym la buh pat ia ki halor jong ka riti synshar ka ri.
“Ka Council ka treikam hapoh ka riti sysnahr bad dei ban burom ia ka hok synshar paidbah jong baroh ki briew kiba la ioh ia ka hok kum ki nongshongshnong kiba sah ha ka thain” ong u Rahman.
Haba kdew ia ka paragraph 2 bad 3 jong ka Sixth Schedule, ula ong ba la aibor iaki District Council ba kin thaw ain halor ki kam ba iadei bad ka jaka, ka riti dustur bad ka synshar tynrai. Hynrei, ula ban jur ba kano kano ka jingpyrrkhing ia ka jingiashimbynta ha ka sain pyrthei ka dei ban don ia ka nongrim kaba skhem kat kum ki ain.
“Kano kano ka jingpyrrkhing ia ka jingiashimbynta ha ka sain pyrthei ka dei ban kyrshan da ka bor ba ioh na ka riti synshar, ka ain kaba biang, bad ka jingpynbna na u Lat ka Jylla- ym da ka jingbatai sain pyrthei ne ka jingsngew” ula ong.
U Rahman ula pynpaw ruh ba ym lah ban shu kyntait ia ka hok tynrai bala pynkup hapoh ka riti synshar. Ula kdew ia ka Article 14 (jingialong ryngkat kyrdan hakhmat ka ain), Article 15 (ka jingkhang ban ibein), Article 19 (ka hok ban kren bad pynpaw ia ki jingsngew) bad Article 326 (ka hok thep vote) kum ki jingiada ba kongsan.
“Ki nongshongshnong bar Jylla bad wat ki bym dei ki Garo kila sah ha ka thain da ki pateng bad kila synniang sha ka roi ka par jong ka imlang sahlang bad ka ioh ka kot”ula ong
Ula ban jur ba ia ka GHADC la pynkha ba kan iada ia ka jinglong ba kyrpang ki riewlum hapoh ki kyndon ka riti synshar ka ri, ym ban kyntiew ia ka jingkyntait iano iano.
