Shillong, Rymphang 28 : U Nongialam ka Liang Pyrshah Mukul Sangma ula pynpaw ia ka jingsngew khia halor ka jingmih ki seng kaikhlaw bad ki jingjia aksiden kali ha Meghalaya ha ka jingiatai ia ka cut motion.
Haba iashimbynta ha ka cut motion ha Iingdorbar ha ka sngi Thohdieng, u Mukul ula kyntu ia ka Sorkar ba kan lum ia ki jingtip halor ka jingdon bynta ki samla ha ki jinghikai kam kaikhlaw, haba pynsngew ia ki khubor ba ki don ki briew ba kieng bad ki tiar siat ba khlain bor kiba iaid ha East Garo Hills.
“Nga tharai ka Sorkar ka dei ban don ia ki jingtip ba haduh katnio ngut ki samla shynrang kila leit shah hikai ban pynkha biang ia ka kynhun kaikhlaw ba thymmai, ka ban long ka jingeh kaba khraw hadien habud” ula ong.
Ula pynsngew ia ka jingdonkam ban iasam ia ki jingtip ha ka por kaba biang haba pyntip ia kaei kaba ula mad kum u Myntri Rangbah. “Ha ka por ba ngi pyniaid ia ka Sorkar, u Myntri Rangbah u ju ioh beit ia ki jingtip halor ka iaid ka ieng ki kaikhlaw hapoh ka por ba dei” ong u Mukul.
U Mukul ula ban jur ia ka jingdonkam ban leh eiei halor ka jingbitar ki samla, haba ai jingmut ban pynkha shuh shuh ia ki battalion ban lah aikam.
“Ki samla ki bitar…pynkha kham bun ki battalion, nginm donkam ban siew tulop…to ngin nym buh ia ki ha kawei ka jaka, ai ba kin iabujli na kawei ka jaka sha kawei pat” ula ong.
Halor ka jingshngain ha surok, u Mukul ula ban jur ia ka jingkitkhlieh lang jong baroh, kynthup ka jingia donbynta lang ki bor khmih bapher bapher. “Ki jingjia aksiden ha surok ka pyndon bynta ia bun ki borkhmih…ki Pulit ki don ia ka bynta ba kham kongsan” ula ong haba ai jingmut ban don ki jingialang ba man ka por jong ka District Road Safety Committee bad ka State – Level Committee.
