Shillong, Rymphang 24: U Myntri ka Koit ka Khiah Bah Wailadmiki Shylla ha ka sngi Ba-ar ula ai jingtip halor ki jingshem jong ka jingtohkit halor ka jingiap u MP ka Shillong Dr Ricky AJ Syngkon, bad pynpaw ba ki Nongtrei ka Mawiong CHC kila shimkhia mardor ban ai jingsumar bad leh ia ki kam kat kum ka jinglah jong ki.
U Bah Wailad ula ong ba ka jingtohkit, kaba la pynlong da u District Medical & Health Officer, East Khasi Hills, kala pynthikna ba ki Nongtrei ka CHC kila pyndep ia ka emergency assessment ne khmih ia ka jingpang ha emergency bad ai mardor ia ki life support mar syn poi u Dr Ricky ha CHC ha ka 19 tarik Rymphang 2026, hadien ba u kyllon ha ka jngialehkai phutbol.
“Ki nongtrei kiba don kila leh ia ki kam hapoh u pud bad jinglah treikam jong ki Community Health Centre, kynthup ka jing eksamin mardor, ai oxygen, leh ia ka CPR bad phah rah hapoh ka por ba biang sha ki jaka sumar ba kham heh” ong u Bah Wailad haba bynrap ba kam shym la don satia kano kano ka jingkyntait ban sumar lane pynslem ban phah rah sha kiwei ki Hospital.
Ia u Dr Ricky la phah rah sha Dr H Gordon Robert Hospital, ha kaba la pynbna iap hadien katto katne por. Ka Tnad ka koit ka khiah ka pynpaw ia ka jingsngewlem sha ki bahaiing hasem u Dr Ricky.
U Bah Shylla ula pynshai ruh halor ka jingkynnoh ba ym don doktor ha Mawiong CHC ha ka por ba rah ia u Dr Ricky ha katei ka jaka sumar, da kaba kdew ia ka jingduna ki doktor hapoh ka Jylla.
“Ngi don hapdeng ka jingduna doktor kaba khraw ha Jylla jong ngi” ong u bah Wailad haba batai ba naki saw ngut ki doktor ba buh ha Mawiong CHC, arngut ki shim shuti ban leit pule postgraduate bad uwei la pynkynriah sha Khliehriat CHC, kaba ieh satang uwei u doktor ban khmih.
U Myntri ula ong ba une u doktor marwei u dei uba lah ban iakren lyngba ka phone bad nang batai ia ki nos katba ki dang ai jingsumar ha emergency.
“U don hangtei baroh shisngi naduh 9 baje mynstep haduh 4 baje janmiet ban khmih ia ki nongpang ha OPD….ki Nos kila iakren ia u doktor lyngba ka phone ba un batai lem ha ka por ba sumar ia u Dr Ricky” ong u bah Wailad.
