Shillong, Rymphang 24: U Myntri Rangbah ka Jylla Conrad K Sangma ha ka sngi Baar, ula pynshai halor ka rukom pyntreikam ia ka Chief Minister’s Special Development Fund (CMSDF), da kaba ong, ba ia kane ka scheme la pyntreikam da ka mynsiem kaba khuid bad kala poi ha man ki jaka jong ka jylla Meghalaya.
Haba jubab halor ka jingsngewkhia ki MLA ha ka Cut Motion ha iingdorbar, u Conrad Sangma ula ong, “Nga sngewthuh ia ka jingsngewkhia ki MLA hynrei ha ka kam synshar paitbah kaba iar, ngi kwah ban long kiba pdiang ia baroh bad kaba ki paitbah ki lah ban iakynduh”.
Ula bynrap, “Ngam ju iaid da ka lynti jong ka jingiadei bad ki seng sain pyrthei. Nga bhah ia ki projek katkum ka jingdonkam” haba bynrap “Ngam ju kylli ia kino kino ki riewshimet halor ka jingdon jingiadei jong ki bad kino kino ki seng, wat ha ka CM Connect programme, Nga shu bhah beit ia ka pisa….nga ai sha ki skul jong phi. Kadei kane kaba ngi wanrah ia ka jingkylla ha ka jingim ka jongki”.
U Conrad ula ong ba CMSDF “kadei kawei na ki scheme kaba la saphriang ha kylleng ki jaka jong ka jylla”.
“Phi lah ban kylli ia kino kino kiba ioh pdiang ia ka CMSDF scheme bad ma ki baroh kin iathuh ia phi bad nga don ia ka jingngeit kaba skhem ban ong, ba ka CMSDF kadei ka scheme kaba la saphriang ha kylleng ki jaka, kala leit sha man la ki jaka kiba don ha kyndong kynshrot jong ka jylla bad ngi leh ia ka da ka mynsiem kaba khuid. Ngim shym la iatai eiei bad ki paitbah namar ba ngi sngew ba kane kadei kawei ka scheme kaba ngi lah ban wanrah ia ka jingiapher bad ngi iohi ia kaei kaba ki paitbah ki donkam. Kum u MLA nga dap da ka jingkmen lada ki paitbah ki ioh ia ki scheme. Kumta wat nym peit ia kane na kano kano ka bynta ban ioh kynthoh” la bynrap u Myntri Rangbah.
Ha kaba iadei bad ka jinglah jong ki MLA, ula ong “Man la ki MLA kin lah ban ioh na ka bynta ki projek haduh T.10 lak ha u snem mang tyngka, ka long kaba kongsan ia man la ki MLA ba kin aplai”.
Ula pynthikna ia u MLA ka Mawlai u Bah Brightstarwell Marbaniang ba yn sa khmih ia ki jingsngewkhia kiba ula pynpaw.
“Ngi ngim don ia kano kano ka jingthmu ban pynsangeh ia kino kino ki scheme” ong u Sangma bad ka iawer ia ki MLA ban iakren halor kane ka mat ha ka kamra treikam ka jongu.
Kham hashwa kane, u Myntri Rangbah ula iada ia ka jingwanrah ia ki jingkylla jongka CMSDF, da kaba ong, ba kila dep ban pynbeit ryntih ia ka rukom mynjur ia ki projek bad pynthikna ba ka pisa kan poi sha man la ki kyndong kynshrot jong ka Meghalaya.
U Sangma ula ong, ba ka CMSDF, mynshwa la phiah ia ka bhah tyngka na ka bynta ka sor bad nongkyndong, ia kaba hap ban iaid lyngba kiba bun ki bynta kaba la pynslem ia ki projek.
“Ngi lah dep ban pynbeit ia ka rukom treikam ban pynthikna ba ki projek kin ioh ia ka jingbhah tyngka kaba mardor” ula ong.
U Sangma ula ong, ba T.50 Klur la mang ia u snem 2025-26 lah dep ban pyndonkam ha kaba ia ka pisa la bhah ia ki district ki bapher bapher kiba kynthup ia ka East Khasi Hills (₹12.88 Klur), West Khasi Hills (₹1.94 Klur), East Garo Hills (₹3.76 Klur), Ri Bhoi (₹3.9 Klur), South West Garo Hills (₹5.1 Klur), East Jaintia Hills (₹2.1 Klur), West Garo Hills (₹13.6 Klur), Eastern West Khasi Hills (₹1.52 Klur) bad North Garo Hills (₹3.5 Klur).
“Kane ka scheme kadei kaba plie ia baroh ki MLA, ki dorbar shnong, NGO bad kino kino ki riewshimet ki lah ban wan mih hi sha ka CM Secretariat” ula ong.
, da kaba ong, ba ia kane ka scheme la pyntreikam da ka mynsiem kaba khuid bad kala poi ha man ki jaka jong ka jylla Meghalaya.){kind=link}