Shillong, Rymphang 23 : U Myntri Rangbah ka Jylla Conrad K Sangma ha ka sngi Nyngkong, ula pyntip ba ka Sorkar Jylla kala tynruh sha ka Sorkar Pdeng ban pynjynsur ia ka rule 100-hectare ban tih dewiong da ka jingstad saian, ha kaba ka jingiakren kala iaid shakhmat ban pynduna sha ka 10 hectare.
“Mynta, ngi la sdang ban iakren bad ki, da kaba ong ba bun na ki nongtih par jong ngi, ki dei ki nongtih par barit baria…Hato ngi lah ban pynduna ia ki kyndon bad pynhiar sha ka 10 hectare? Kumta, ka jingiakren halor kane kala iaid mynta, ngin iai iakhun ban ioh, ngi khlem shongthait” ong u Conrad haba iakren bad ki nongthoh khubor.
Ula pynpaw ba ka jingsdang ia ka license system bad ka jingtih dewiong da ka jingstad saian kum ka “sienjam kaba khraw bha” bad bynrap “Mynta, ngi la leh ia ki kam ban peit ba kumno ngin lah ban kham pynbha da kaba pynduna ia ka jingbun hectare na ka 100, lehse 50 lane 40, lada long kaba lah, sha ka 5 haduh 10 ruh”.
Kala bynrap, u Myntri Rangbah ula pynksan ia ka rai jong ka Sorkar ban mynjur ia ka jingdonkam jaka ba 100 hectare ban tih dewiong da ka jingstad saian, haba ong ba ka dei ka jingshim rai kaba eh bha, kaba la shim tang ban ioh pynsdang ia ka kam.
“Ha Meghalaya, ka rukom bat jaka ka long kaba pher, donkam ban shna ia ki ain bad ki rule kiba iapher….ngi lah iaid ha ka lynti kabym tip shaei yn poi bad ngim tip ruh ia kaei ka ban mih” batai u Conrad.
U ong ba ka Sorkar Pdeng kala kren shai ba 100 hectare ka dei ka bym lah shuh ban iakren pynbeit “Lada ka Meghalaya ka kwah ia ki nongtih par kiba thmu shisha”.
“Kumta, nga hap ban shim ia ka rai…Nga rai, to ngin sdang. Nga lah ban nym ioh ia baroh 20 point ba nga pan…ngin sa iakren biang ia kane kham hadien” ula ong haba bynrap ba la bthah ia ki nongtih par ba kin iatreilang ha kaban lah pyndap ia ka kyndon ba 100 hectare.
