Kynthoh tyngeh ka HYC | Jingpynslem ban pynkylla ia ka thup Scheduled Tribe dei ka jingkhein sting ka Sorkar

Shillong Rymphang 23: Ka seng Hynñiewtrep Youths’ Council (HYC) ha ka sngi Nyngkong, kala kynthoh ba ka jingpynslem jong ka Committee ban aiti ia ka kaiphod ba tyrwa ban pynkylla noh ia ka thup Scheduled Tribe Order 1950, ka pyni ia ka jingbym shimkhia ka sorkar ban iada ia ka hok bad jingmyntoi jong ki trai ri trai muluk.

“Ka seng kala dawa lah slem bha na ka Sorkar Meghalaya bad ka Sorkar India ban wanrah ia ka jingpynkylla ia ka Scheduled Tribes Order, 1950 bad ka dap da ka jingsngewkhia bad jingsngewsih halor ka jingkren jong u Myntri Rangbah ka Jylla ba ka Sorkar ka dang iai ap ïa ka kaiphod jong ka Committee ba la thaw ban eksamin ïa ka jingpynkylla wat hadien ba la dap 14 bnai naduh ba la thaw ia ka” ong u President ka HYC u Bah Roy Kupar Synrem ha ka kyrwoh khubor.

Ula ong, ba ka jingbteng ban pynslem ban aiti ia ka kaiphod jong ka Committee ka pyni ia ka jingbym shim khia bad jingkhein sting na ka liang ka Sorkar ban iada ia ka hok bad jingmyntoi jong ki trai ri trai muluk jong ka Jylla.

“Ka HYC kala buh jingkylli ba kan don jingmut ne jingthmu aiu ban thaw ia kum kane ka Komiti lada ia ka kaiphod jong ka yn pynslem ban aiti khlem da buh por. Ki trai ri trai muluk jong ka Meghalaya kidei hok ban ioh ia ka jingpynshai. Ka jingleh bym pyrwa bad jingkhein sting ban pynslem jong ki bor synshar ka pyni iaka jingbym khein kor bad ka jinglehkai ia ki jingmyntoi ba la buh kyrpang ia ki trai ri trai muluk jong ka Jylla bad ruh ka pynpyrkhat sniew ba ioh lehse ka don eiei sha lyndet” ong u Bah Synrem.

Ka HYC ka dawa ba ka Committee kadei ban ai ïa ka kaiphod jong ka hapoh ka por ba lah buh bad ia kata ka Kaiphod dei ban buh hakhmat u paidbah ban tip bad ai jingmut lada donkam shuwa ba ka Sorkar Meghalaya kan shim rai bad phah ia ka jingtyrwa hakhmat ki bor kiba hajrong.