Shillong, Rymphang 21: Ki Samla Pule, ki nonghikai bad ki nongtrei jong ka skulbah North-Eastern Hill University (NEHU) hynne ka sngi Thohdieng kila ai burom ia u MP ka Shillong u Dr Ricky AJ Syngkon, da kaba khot ia u kum “U briew uba la aiti lut ha ka kam hikai bad ha ka kam sain pyrthei”.
Ha ka jingialang sngewlem kaba la pynlong ha Multi Use Convention Hall jong ka skulbah, u Prof. Rajkumar Giridhari Singh, Head jongka Department of Commerce, ula pynpaw ia ka jingai jingshakri kaba 23 snem jong u Dr Syngkon ia ka skulbah bad pynpaw ia ka jingtbit ka jongu ha ka kam ban ai jinghikai bad ban tei ia ka imlang sahlang.
“U long uba la aiti lut ha ka kam hikai bad ban tei ia ka imlang sahlang” la ong u Prof. Singh.
U Prof Moses M Naga, Dean, School of Economics, Management and Information Sciences, ula pynkynmaw ba u Dr Syngkon u long u briew uba sbun mynsiem bad ka jingkhlad noh ka jongu ka long ka jingduh kaba khraw ia ka skulbah baroh kawei.
Ula kren shaphang u Dr. Syngkon uba don ia ka jinglong kaba sngewrit bad ia ka jinglong kaba skhem ha ka jingngeit Blei.
Ka Amoreena L. Nongpiur, kala pynpaw ba u Dr Syngkon u long u Supervisor uba tbit bha, da kaba ong, “U Supervisor uba kum u Dr Syngkon kan long kaba eh ban shem. Ka jingthylli jong ka jaka kaba ula iehnoh ka long kaba eh ban pyndap”.
U Prof. Sumarbin Umdor, Pro Vice-Chancellor, ula pynpaw ia ki jingsah jingkynmaw ha ka jingiadei shimet ka jongu bad u Dr. Syngkon bad ula phah ia ka jingsngewlem sha ki bahaiing bahasem bad buh jingduwai ba ka mynsiem ka jongu kan shong jahthait junom.
Katba u Prof. Lakhon Kma, President ka NEHUTA, ula pynpaw ia ka jingsngewlem sha ki bahaiing bahasem bad ula pynkynmaw ia ka por kaba ma u bad u Dr. Syngkon kila iakhun lang ha ka elekshon MP bad u Dr. Syngkon ula jop donburom.
U Prof. Kma ula iathuh ba ula phah da ka message ban ai khublei ia ka jingjop ka jongu, hynrei u Dr. Syngkon ula phone noh mardor ia u ban pynpaw ia ka jingsngewnguh bad ula banjur ban iatreilang na ka bynta ka bha ka miat jong ka skulbah, ka jylla bad ki paitbah.
 hynne ka sngi Thohdieng kila ai burom ia u MP ka Shillong u Dr Ricky AJ Syngkon, da kaba khot ia u kum “U briew uba la aiti lut ha ka kam hikai bad ha ka kam sain pyrthei”.){kind=link}