Shillong, Rymphang 20 : Ki Nongialam na ki Seng Sain Pyrthei bapher bapher kila ai burom khatduh ia u MP ka Shillong Dr RickyAJ Syngkon ha Iingdorbar Thaw Ain ha ka sngi Thohdieng, haba pynsngew ruh ia ki jingiakynduh shimet bad ka jingshem ha ka jingiatreilang bad u. Kila kynmaw ia u kum u Nongialap ba aiti hok, u Nonghikai bad u riewsain pyrthei uba la ieh shadien ia ki kam kiban neh junom.
U MLA ka UDP na West Shillong Bah Paul Lyngdoh ula ong “Nga ieng ban iasnohkti lang bad ki Nongialam jong ka Iingdorbar bad ki Liang Pyrshah ban pynpaw ia ka jingsngewsih halor ka jingkhlad noh u khun ba don burom ka ri. Ha kajuh ka por, katba ngi dang iasngewsih ia ka jingiap ba khlem pat dei por, to ngin lehkmen ia ka jingim bala im bha”.
U Bah Paul ula pynkynmaw ia ka jingiakynduh bad u Dr Syngkon bad ong “Nga la iakynduh bunsien ia u Dr Ricky, nyngkong kum u Assistant Professor ha NEHU bad hadien ha ki kam sain pyrthei….U dei u briew ba pher na baroh, u wan na ka kam kaba bun ki jingtynjuh, ka jingisih bad jingshun hynrei watla katta ula pynpaw ia ka jingsngewrit, ka jingaiei bad ka jinglong jemnud”.
U Bah Paul ula iaroh ia ka jingshakri u Dr Syngkon bad ong “Ula wan ban pyni ba ki don ki jait riew sain pyrthei kiba la wan sha ka jylli ban shakri ym ban shah shakri” ula pynkut haba pynpaw ia ka jingsngewlem sha ki bahaiing hasem u Dr Syngkon.
U Myntri bording bad President ka UDP Bah Metbah Lyngdoh ula ong “Nga ioh ia ka khubor na katto katne ki paralok kiba ong ‘dang khynnah palat ban khlad’. Nga thikna ba baroh na ngi ngin mynjur ia kane ka khubor haba phai sha ka rta jong u Dr Ricky Syngkon”.
U bah Metbah ula pynpaw ia ka jingsngewsih ba ka samoi treikam u Dr Syngkon kala neh teng khyndiat por bad ong “Ki paidbah ka Shillong Constituency kila jied ia u na ka bynta ka samoi treikam ba san snem, haba khmih lynti ia u ban pyni kam, hynrei tang hapoh shisnem bad khyndai bnai, um don shuh bad ngi”.
Une u Heh ka UDP ula iaroh ruh ia ka jingiakynduh hapdeng u Dr Syngkon bad u Myntri Rangbah ka Jylla bad ong “Nga sngewkmen ban ioh sngew na u CM halor ka jingiakynduh jong ki….u don ia ka jingthmu kaba bha na ka bynta ki paidbah ka Jylla”.
Ula pynkut, “Nga kwah ban pynpaw ia ka jingsngewlem naduh ka mynsiem sha baroh ki bahaiing jong u Dr Ricky bad ngi duwai ba u Blei un ai ha ki ia ka bor bad ka jingkyrshan ha kum kane ka por”.
U MLA ka NPP na Nongpoh Dr Celestine Lyngdoh ula kyntu ia ki paidbah ban lehkmen halor ki jingjop ha ka jingtreikam jong u Dr Syngkon ha ka jaka ban iasngewsih ia ka jingkhlad noh jong u.
“Haba ngi peit ia ka jingim u Dr Ricky, ngim dei ban sngewsih hynrei ngi dei ban lehkmen ia ki jingjop jong u ha ka pule puthi bad ka jingim shakri paidbah” ong u Dr Celestine.
Ula pynkynmaw ia ka jingiakren bad u Dr Syngkon ha ka por jong ka elekshon MLA 2023 bad ong “U Dr Ricky ula ktah ia nga na tyrpeng bad ong “ lada jop u Dr Kot ne jop u Dr Briew’ kaba mut lada jop mano mano ruh, ngi dei ban trei shitom na ka bynta ka jingmyntoi ki briew jong ngi”.
U Myntri ka koit ka khiah Bah Wailadmiki Shylla ula pynpaw ia ka jingkyndit halor ka jingkhlad ba syndet syndet jong u MP ka Shillong Dr Ricky AJ Syngkon haba pynkynmaw ia ka jingdon jingiadei bad ka thymmei jong u. Ula ong “Dang ha ki khyndiat sngi, ula wan ha Jowai ban pyniaid ia ka jingialang DISHA. U ju kren beit da ka Pnar bad kane kala pyniajan ia u paidbah”.
