Shillong, Rymphang 19 : U Myntri Rangbah ka Jylla Conrad K Sangma ula pynbna ba ka Dorbar Mang tyngka ba dei ban long la sngi Thohdieng, lah ban pynkynriah sngi noh kum ka dak ka jingburom ia u MP ka Shillong Dr Ricky AJ Syngkon, uba khlad kyndit ha ka janmiet sngi Palei.
“Ngi la iakren bad u Symbud Myntri Rangbah ba khmih ia ka Parliamentary Affairs Bah Prestone Tynsong bad ngin sa iakynduh lashai bad ka Business Advisory Committee (BAC) ba khlieh da u Lamphang. Ngin sa shim ia ka rai lashai ka sngi” ong u Conrad.
“Nga la aiktien ia u DyCM ba kan bha shibun ia ka Sorkar ba kan nym pyniaid shakhmat ia ka Dorbar ban long lashai ka sngi. Watla lashai ka sngi ka dei ka sngi ba ngi dei ban wanrah ia ka mang tyngka, ngi sngewdei eh bad burom iaka mynsiem ba la leit noh lada ngi pynkynriah ia ka sngi wanrah ia ka mang tyngka” ula bynrap.
U Conrad ula pynpaw ia ka jingkyndit bad jingsngewsih halor ka jingkhlad kyndit jong u MP ka Shillong Dr Ricky AJ Syngkon, haba pynkynmaw ia ka jingiakynduh bad u dang shen ha Delhi bad iakren ia ki jingthmu kam pynroi na ka bynta ka Meghalaya.
“Ka dei ka khyllipmat ba kyndit ia baroh ki nongshongshnong ka Jylla. Nga la iakynduh ia u Dr Ricky AJ Syngkon dang artaiew mynta ha Delhi….Ngi la iakren ia ka lawei jong ka Jylla jong ngi khlem da ktaid politics, bad ka dei ka jingiakynduh ba khatduh bad jingiakren ba nga ioh bad u Dr Ricky Syngkon” ong u Conrad.
U Conrad ula kynmaw ia ki jingaiti bad ka jingieid jong u Dr Ricky ia ki paidbah ka ri-lum Khasi bad Jaintia, haba pynpaw ba ka jingkhlad noh jong u, ka dei ka jingduh kaba khraw ia ka Jylla.
“Nga pynpaw ia ka jingsngewlem sha ki bahaiing jong u (L) Dr Ricky Syngkon bad nga duwai ba u Blei un ai ka bor sha ki bahaiing hasem bad ruh sha baroh ki nongkyrshan, ki nongialam ka party, ba kin ioh jingpyntngen ha kane ka jingduh kaba khraw” ula ong.
