Shillong, Rymphang 19 : U Myntri Rangbah ka Jylla Conrad K Sangma ula kular ha Iingdorbar ba ka Sorkar Jylla kan sa shong bishar biang bad wanrah jingpynkylla ia ka Meghalaya Residents Safety and Security Act (MRSSA), 2016, ban lah leh eiei halor ki jingsngewkhia kiba iadei bad ka jingwan rung beain ki mynder ri.
Kane ka jingpynkylla ka thmu ban pynthikna ba ka Act kan ieng rasong lada ka shah bishar ha Iingkashari bad ka Sorkar Pdeng.
“Nga kular ia ka Iing ba ngin sa shong bishar biang ia kiei kiei baroh bad ngi peit ha kano ka rukom ngin wanrah ia ka jingpynkylla ha ka MRSSA, ka ba lah ban ieng rasong ha ka jingbishar ki Iingkashari ne ka Sorkar Pdeng bad ka Parliament” ong u Conrad haba jubab ia ka Resolution bala wanrah da u Nongialam ka Liang Pyrshah Mukul Sangma, uba kyntu ia ka Sorkar ban pyndep noh ia baroh ki kam ba iadei bad ka jingpynieng ia ki Facilitation Centre ha ki Entry-Exit Point bala dep ithuh kiban long ryngkat ki kyndon treikam ba thikna bad ban buh lut ia baroh ki lad jingiada kumba la kdew ha ka MRSSA, 2016.
U pyntip ba ha ka jingshisha, ka Ministry of Home Affairs (MHA) kaba bthah ia ka Sorkar Jylla ba kan shong bishar biang ia ka MRSSA.
“Ka MHA kala bthah ia ki ban iakhmih biang ia ki kyndon ka MRSSA. Ngi lah iashong bad ka Tnad Ain, AG bad ka Tnad kam Pohiing ban iaid lyngba ia baroh ki ain bad ki rules kiba kyllain” ong u Conrad.
U iathuh ba ka Srkar ka don ruh ia ka jingthmu ban pynim ia ki Entry-Exit Point lyngba ka Immigration and Foreigners Act, 2025, da kaba pynrung ia ka kyndon Restricted Area. “Kane ka dei ka kam kaba ngi pyrshang ban leh” ula ong.
Haba pdiang ia ki jingai jingmut halor kane ka kam, u Conrad ulaong “Lada donkam ia ngi ban iakren bad ki seng sain pyrthei….ngi pdiang ia ka. Ngin sa pynlong ia ka jingialang ban iakren bad shim ia ki jingai jingmut ba ha kano ka rukom ngin pynkylla ia ka MRSSA bad ban nang aibor shuh shuh ia ka”.
U Conrad ula pynpaw ba ki lad kamai kajih ka dei kaba pynshlur ia ka jingwan rung beain ki mynder ri bad ong “ Ki (mynder ri beain) la wan shane namar ka ioh ka kot, ki ia ioh kam ban trei”.
Haba pynpaw ia ka jingsngewhun ia ka jubab u Myntri Rangbah, u Mukul Sangma ula weng noh ia ka resolution bad ong “Ka jingmut jingpyrkhat jong nga ka long kaban iatei. Nga kwah ban ong khublei shibun ia u Myntri Rangbah. Ka jingiakren mynta ka sngi ka pyni ia ka jingiakut jingmut lang bad ka jingthmu ban nang wanrah ia ka jingsngew kitkhlieh halor kane ka mat ba kongsan”.
U Mukul ula iaroh ia ka jinglong ba kloi kasorkar ban iatrei ryngkat ryngkat lang bad ong “Ngi phaikhmat sha baroh kita ki lad iatreilang”.
, 2016, ban lah leh eiei halor ki jingsngewkhia kiba iadei bad ka jingwan rung beain ki mynder ri.){kind=link}