Shillong, Rymphang 16 : U Lat ka Jylla CH Vijayashankar ula plie ia ka Dorbar Mang Tyngka ka Jylla ha ka sngi Nyngkong da kaba pynpaw ia ka jingkiew ka GDP ba kot 9.66% ha u snem 2024-25 kum ka jingpynshisha ba kala jam shakhmat ban kynjoh ia ka thong (vision) 2032.
“Katba ngi dang bteng ïa ka jingïaid lynti kaba angnud ban kynjoh ia ka vision 2032, da ka thong ban pynkiew lai shah ia ka ioh ka kot ka Meghalaay na u snem 2022, kane ka khyllipmat ka ailad ia ngi ban pynthymmai ia ki jingkut jingmut lang jong ngi sha ka jingkiew bad jingroi jong ka Jylla ba itynnad jong ngi” ong u Vijayashankar ha ka jingkren ha Iingdorbar.
“Mynta ka sngi, ngi ieng tylli kawei ban bat ia ka Riti Synshar bad ban pynthikna ba ka jingkiew shaphrang kan poi sha uwei pa uwei u nongshong shnong jong ka Jylla Meghalaya. To ngin iaid shaphrang ryngkat ryngkat da ka jingthmu bad jingngeit skhem, ba la ialam da ka jingiohi jngai lang jong ngi ia ka Jylla Meghalaya kaba roi bad kaba kiew irat” ula bynrap.
U Lat u la pynwan ïa ka jinglah treikam ba dang shen jong ka Sorkar kum ka kam ba kyrpang bha bad ong, “Ka Meghalaya mynta ka wan ha ka kyrdan kaba ar ha ka jingkiew stet tam ha India hadien ka Tamil Nadu, da kaba kot ka jingkiew ka GDP haduh 9.66% ha u snem 2024-25.”
U la bynrap, “Tang ka Jylla jong ngi kaba lah ban pynneh ia ka jingkiew kaba kot 10% ha ki ar snem lynter hadien ka khlam Covid. Ka ioh ka kot jong ngi ka la kiew haduh ar shah tang hapoh hynniew snem, na ka T.29,508 klur sha ka T.59,626 klur ha u snem 2025, ka jingpynshisha ia ka jinglah ban jop jong ki briew jong ngi ia ki jingeh.”
U Lat u la kdew ba ka sorkar ka la buh ia ka Meghalaya Excellence Framework kum ka lynti iaid jong ka.
“Ban kynjoh ïa ka thong ba bun bun snem, ka Jylla ka la thaw ïa ka Meghalaya Excellence Framework, ka lynti treikam ba kongsan ba kan don hapdeng ki 10 tylli ki Jylla ba hakhlieh duh jong ka ri India haba phai sha ka per capital income ne ka ïoh ka kot jong uwei pa uwei u briew bad ki thong jong ka jingroi ba neh hapoh u snem 2032.”
Ula ong ba ka jingkiew ka shong eh ha ki kam kiba kongsan-“ka rep ka riang, ki surok, ka bor ding, ka jingsam um, ka jingkyntiew ia ka jingkynshew kam, ka IT & Communication bad ki kam jngohkai, kiba long ki nongwanrah ia ki jingkylla ba kham khraw eh”-bad ka jingkynshew ha ka imlang sahlang.
“Ki prokram ba don da ka thong ha ka koit ka khiah, ka pule puthi, ka jingthaw ia ki lad kamai, ka jingïada ïa ka imlang sahlang, bad ka jingsynshar kaba pynshong nongrim ha ki nongshong shnong ki pynthikna ïa ka jingbha jingmiat ba pura jong uwei pa uwei u nongshong shnong.”
U Vijayashankar u la ïathuh ruh ha ka Ïingdorbar ba ka Meghalaya ka dang pynïaid shakhmat ia palat shispah tylli ki projek ba la ïarap nabar (Externally Aided Project) kiba shongdor palat T.12,000 klur, haba kdew sha ka jingithuh jong ka ri ïa ki kam jong ki Nongshongshnong ban iada ia ka mariang bad ka jingkylla ka suinbneng.
U Lat ula bynrap ba ka Meghalaya kala pyntrei ia 15 tylli ki project ba iadei bad ki kam bapher bapher, ha kaba sa artylli ki dang don ha ka jingiakren ban shim ram, ki ban kot kumba T.12,166 klur.
“Shibynta na kine ki kam ki dei ki ban ioh da ka Grant ka Sorkar India, katba kaba tam yn bei da ka Jylla. Ka Sorkar kala mynjur ruh ia ka song pisa ba T. 6 klur ha ka CM Catalytic fund ban pyniaid sted ia ka SDG ha baroh ki 12 tylli ki District ka Jylla”.
U Viajayashanka ula ong ruh ba ka jingkyrshan ka Sorkar Pdeng kala nang iarap ia ka jingiaid shakhmat jong ka Jylla.
“Ka Sorkar kala ioh ruh ia ka jingkyrshan ia kiba bun ki project jingtei na ka Ministry of Development of the North-Eastern Region lyngba ki skhim bapher bapher ban pyntyllun shakhmat ia ki kam jngohkai, ka jingsam umbam umdih bad ki lad pyniasoh ha kylleng ka Jylla”.
Hapoh ka PM-DevINE, hynniew tylli ki project ba kot palat T.77 klur, kila iaid shakhmat, kynthup ka Integrated Sohra Circuit Development Project ba T. 234 klur, ia kaba u ong ba kan nang iarap ban buh ia ka Sohra ha ka Tourism Map jong ka pyrthei.
Kiwei pat ki project ki kynthup ia ka Shillong Peak Ropeway bad ka Unity Mall ha New Shillong, kiba thmu ban nang pynsngewtynnad ia ki nongwankai bad ka jingkiew shaphrang ka sor.
U Lat u la kdew ïa ka jingpynshisha ba iohi da ki khmat ruh kumjuh bad ong, “Ka Economic Survey 2025-26 ba dang shu pynmih dang shen da ka Sorkar India ka la ai jingïaroh ïa ka rukom pynroi jong ka Meghalaya kaba la pynïaid da ki paidbah, na ka bynta ka jinglah ban ïakhun pyrshah ïa ka jingkylla ka suiñbneng bad ka jingïada ïa ka mariang.”
U la kdew ïa ki dak jong ka model—ka MegARISE, ka jingshna map ïa ki umpohliew, bad ka jingpyllang ia ka um kaba ïahap bad ka jinglong ka suiñbneng—da kaba ong ba ka jylla ka la “shna map ïa palat 55,000 ki umpohliew bad pyntreikam palat 500 tylli ki project pynlang um ha ki 8,430 hektar ha kylleng ka Jylla.”
Nalor kane, u Lat u la ong ba ka jingkhring ka Meghalaya ia ka jingkynshew pisa ki riew shimet ka nang kiew, da ki jingpynkylla ia ka rukom synshar lyngba ki kor digital bad ka jingpynkylla ia ki kyndon ba la thmu ban pyniar ia ki jingmyntoi.
“Ka Sorkar ka dang iai kut jingmut kaba shlem ban khring ïa ka jingkynshew pisa ki riew shimet lyngba ka Public Private Partnership ban kyntiew ïa ka roi ka par bad ban thaw lad ha ka aikam ai jam ïa baroh ki nongshong shnong,” ong u Lat.
U la kdew ba ki prokam ka Jylla ki la “khring ia palat T.1,800 klur ha ka jingkynshew pisa ki riew shimet,” bad buh ia ka thong ban “kyntiew palat T.8,000 klur ha u snem 2032 bad pynmih palat 50,000 tylli ki kam.”
Ki project ba dang shen ki pyni ia ka jingjam shakhmat ka Jylla : “Ka jingkynshew kam ba T.330 klur jong ka Varun Beveragers ha North Garo Hills,kala aikam iapalat 500 ngut, bad ka Taj Umiam Resort bad Spa ba T.300 klur, kaba dei ka project pynbiang jaka sah ba heh duh ha ka thain Shatei Lam Mihngi, kaba la buh maw nongrim dang shen.
U Lat ula pynpaw ruh ba ka Sorkar ka don ia ka jingkut jingmut kaba skhem ban pynkhlain ia ki jingtei haba phai sha ki surok bad ki jingkieng, haba ithuh ia ka bynta ba kongsan ban pynbiang ia ki lad pyniasoh bad ka jingkiew ka ioh ka kot ha ka Jylla.
“Ki surok ha Meghalaya mynta kila kot palat 13,000 km, kynthup ki National Highway ba 1,181 km” ula ong haba pynpaw ba naduh u snem 2018, palat 2960 km ka surok la shna ha ka jingpynlut kaba kot palat T.5000 klur.
Ula pynpaw ba hapoh ka Pradhan Mantri Gram Sadak Yojna, “ha kine ki san snem bala leit, 1180 tylli ki skhim shna surok la lah ban pyndep ha ka jingpynkut ba kot palat T.3200 klur, kaba pyniasoh ia kumba 300 tylli ki shnong.” Hapoh ka PMGSY-IV, haduh 258 tylli ki shnong kin sa ioh surok”.
Nalor kane, sa T.260 klur na ka Central Road Fund la kynshew ban pynbiang ia ki surok ha ki jaka Nongkyndong.
U Lat ula bynrap ba ka Shillong-Silchar Greenfield High Speed Corridor ba T.22,000 klur kan iarap bha ia ki lad pyniasoh jong ka thain bad weng ia ki jingeh ha ka kit ka bah jong ka thain.
 2032.){kind=link}