Shillong Rymphang 14: U Myntri Rangbah ka Jylla u Conrad K. Sangma hynne ka sngi Saitjain, ula iashimbynta kum u kongsan ha ka jingpynhap pyrda ia ka 56th Annual Koch Conference kaba la long ha Belbari, South West Garo Hills district.
Ha kane ka jingialang la iadonlang u MDC ka Betasing u Sanjay Koch kum u kongsan symbud ryngkat ka jingdonlang u Deputy Commissioner ka South West Garo Hills, Anendya Raajsshre bad kiwei kiwei.
Ha kane ka jingialang kaba 3 sngi kaba la sdang ha ka 12 tarik u Rymphang la pynkut noh hynne ka sngi da ka jingiashimbynta ki nongialam shnong, ki nongshah khot sngewbha bad ki dkhot jong ka jaidbynriew Koch na kylleng ka thain bad ha kane ka prokram ka Meghalaya Koch Association kala aiti ia ka dorkhas ha u Myntri Rangbah ka jylla.
Haba kren ha ka jingialang, u Myntri Rangbah ula pynpaw halor ka jingriewspah ka rilum Garo ha ka jingdon ia ki jaidbynriew kiba don ia ki kolshor, riti dustur bad ki niam bapher. Ula banjur ba man la ki jaidbynriew kila noh synniang na ka bynta ka jingkiew bad ka roi ka par jong ka thain da kaba buh hakhmat eh ia ka bha ka miat jong ka jylla.
“Wat hapdeng jong ka jingdon ia ki jaidbynriew bapher, hynrei ngi dei hi na kajuh ka jylla bad na kajuh ka ri bad kane ka jingiatylli jong ki jaidbynriew bapher kadei ka jingkhlain kaba khraw tam” ula ong bad ka bynrap ba ka sorkar kala iai bud beit da kaba ai kyllum ia baroh bad ka iengskhem ha ka jingkular ban burom bad ban kyrshan ia baroh ki jaidbynriew.
Ula ong, ba ka sorkar kala iai bteng ban ai jingkyrshan ia ki jaidbynriew bapher na ka bynta ban tei ia ki jingtei bapher, ban kyntiew ia ka kolshor, ban pynneh pynsah bad ban don ruh ia ki prokram ban sam mar kylliang ia ki jingtip.
Ula kubur ia ki jingeh kaba mad da ki ritpaid bad ula ong, ba ka sorkar ka sngewthuh bha ia ka jingsngewkhia ka jongki bad ka bynrap ba ki jaidbynriew Garo, Khasi bad Jaintia kidei kiba heh paid ha ka jylla, kidei pat ki ritpaid hapoh jong ka ri, kumta ka long kaba kongsan ban iada ia ka bha ka miat jong baroh ki kynhun.
Ha kaba iadei bad ki mat kiba la pynpaw ha ka dorkhas, u Myntri Rangbah ula kren halor ka jingtyrwa halor ka jingsngewkhia ban kynthup ia ka ktien Koch bad ula pynthikna ia ki ba ka sorkar kan sa khmih bniah ia kane ka mat. Ula pynpaw ba ka jylla kadei ka iing ia kiba bun tylli ki jaidbynriew, kaba kynthup ia ki Hajong, Rabha, Koch bad Maan bad ula banjur ia ka jingdonkam ban pdiang ia ka jingangnud jong baroh ki kynhun bad ban ioh ia ka jingmynjur da kaba iasyllok lyngba ki jingiakren.
Haba kren halor ka jingpyndonkam ia ka ktien Garo bad Khasi ha ki District Selection Committee Examination, ula pynshai namar ba ka ktien Garo bad Khasi ka lah dei lypa ka Associate Official Languages, kumta ka long kaba donkam ban pynthikna ba ka rukom iakren bad ka jingai jingshakri kan long kaba iaid beit.
“Ka Eksam DSC na ka bynta kano kano ka kyrdan kan ym dei kaban leh lut baroh ha ka Garo ne Khasi. Kan don tang kawei ka ‘Qualifying Paper’ ha Garo ne Khasi, kan shong ha ka district ia kaba ki nongleh ia ka eksamin ki aplai”.
U Myntri Rangbah ula pynshlur ia ki samla Koch ba kin shimkabu ia ki lad kum ia ka Chief Minister’s Research Grant ban pynurlong ha kaba iadei bad ka jingpule ka jongki.
Ka dorkhas kaba la aiti da ka Association kala pynpaw ia ki katto katne ki mat jingdawa, kaba kynthup ban ai jingmynjur ban pynlong ia ka ktien Koch kum ka ‘Medium of Instruction’ ha ki Lower Primary Level ha ki jaka kiba shong basah ki Koch hapoh jongka National Education Policy 2020 ban pynneh pynsah ia kane ka ktien kaba la sdang ban duhjait bad ban kyntiew ia ka pule puthi.
Kala dawa ruh ban don ia ka jingpynjynsur ia ka jinglah ia ka ktien ha ka jingaikam aijam bad ban ioh ban pule ha ki jaka pule ia ki dkhot jong ka jaidbynriew Koch tad haduh ba kila don ia ki jaka pule kiba la biang pura.
Kila kyrpad ban thung ia u nongialam shnong kum u Chairperson jongka Village Employment Committee ha ki jaka rithor ban pynkhlain ia ki shnong ki thaw ha ka jingpyntreikam ia ki prokram ban kyntiew ia ka thain nongkyndong.
Kala kyrpad ruh ban pyniar bad ban pynkhlain ia ka jingshngain jong ka Koch Boys’ Hostel ha New Tura, kaba kynthup ia ka jingtei ia ka kynroh, ban tei ia ka jaka pynlong ia ka jingialang bad Cultural Hall ha Belbari ban kyntiew ia ka jaidbynriew bad ia ki kam kiba iadei bad ka kolshor.
La pynkut ia kane ka prokram da ki jingrwai bad ki jingshad tynrai ban rakhe ia ka jingriewspah ka jingdon jingem kaba naduh hynthai jong ki jaidbynriew Koch ha Meghalaya.
