Khyndai ngut ki Nepali kiba iap, hynniew ngut kiba mynsaw jur
Shillong, Rymphang 13 : Ka Embassy ka Nepal ha India, kala pynpaw ia ka jingsngewlem naduh ka mynsiem hadien ka jingiap ki khyndai ngut ki paid Nepali ha ka jingbthei ka par tih dewiong beain ha Mynsngat-Thangsko, East Jaintia Hills myn ha ka 5 tarik Rymphang, 2026.
Ha ka kyrwoh, ka Embassy kala pynthikna ba kine ki lanot kila duh iala ka jingim ha ka jingbthei bad phah ia ka jingsngew lem ia ki longiing kiba shah ktah.
Haduh khyndai ngut ki paid Nepali kila iap ha kane ka jingjia bad hynniew ngut kila mynsaw jur bad dang don mynta hapdeng ka jingsumar ha hospital. Ka Embassy kala peit thuh bha ia ka jinglong jingman ka koit ka khiah jong kine kiba mynsaw bad kitbok ba kin koit noh.
La pyntip ba ka Embassy kala iatreilang khlem sangeh bad ka Ministry of External Affairs ka Sorkar India bad kumjuh ruh bad ki bor pyniaid District bad ki Pulit, ban pynthikna ia ka jingsumar kaba biang, bad ka jingai jingiarap ia ki lanot bad ki longiing jong ki.
Ki longiing kiba kwah ban ioh ia ki jingtip lane ki jingiarap ki lah ban phone sha ka Embassy ha u nombor +91-9205195035.
Kat kum ka kyrwoh, ka par dewiong kaba bthei lah ong ba ka dei kaba pyntrei beain. Ka Embassy kala maha ba ka jingtrei bylla ha ki par dewiong ba khlem ioh jingtip bunsien ka ju buh jingeh ban wan ki nongiarap bad buh jingeh eh ban pynioh ia ka bailutksan bad kiwei ki jingmyntoi haba don kino kino ki jingjia ki bym lah ban tip lypa.
Haba pynmih ia ki jingbthah ia ki paidbah, ka Embassy kala kyntu ia ki nong Nepal ba kin husiar bha bad ban nym ngop ha ki agent ba turwa aikam ha ki jaka ki bym shngain. Ka la bthah ia ki nongbylla ba kin da pynshisha shuwa ia ki jingtip shaphang ki nongaikam, ka bai bylla, ki jingmyntoi ba ki ioh bad ban pyndep ia baroh ki jingdonkam kat kum ka ain hashuwa ban pdiang leit bylla.
