Wanrah ka Meghalaya tulop thymmai ki Nonghikai | Kular ka jingshakri haduh ka rta ba 58 snem

Ai CPF bad ka Increment ba 3% shisnem

Shillong, Rymphang 12 : Ka Sorkar Meghalaya kala wanrah ia ka jingsiew tulop bala pynbeit ryntih (structured pay) na ka bynta ki phew hajar ngut ki Nonghikai, da ka jingthmu ban pynthikna ia ka rukom siew tulop kaba shai, ka jingshngain ha ka ioh ka kot, bad ka jingshakri kaba skhem ha baroh ki skul ha Jylla.

Ka jingpynbna, bala pynmih da ka Tnad Pule Puthi ha ka 12 tarik Rymphang, ka ong ba kane ka rukom siew tulop ba thymmai kan sdang treikam naduh ka 1 tarik Iaiong, 2026.

Kane ka tulop thymmai kan treikam ia ki nonghikai SSA (LP &UP), Nonghikai RMSA (Secondary& Higher Secondary), Nonghikai Adhoc, 4th Teacher (UP), Nonghikai Science & Hindi bad ki Nonghikai Pre-Primary kiba ju shim ia ka tulop ba la buh beit thik ba kin ioh (fixed).

Ha kane ka jingpynbeit ba thymmai, ki Nonghikai kin ioh ia ka Base Pay bala pynshong nongrim kat kum ki snem jong ka jingshakri jong ki, ka Composite Annual Increment (CAI) ba 30% na ka Base Pay, ka Centralised Provident Fund (CPF) bad 8 % ka synniang na man ki nongaikam bad nongtrei. Ka Increment ba man u snem kan shong ha ka jingbishar ia ka jingshakri da ki Headmaster, Headmistress lane Principal.

Kane ka tulop thymmai ka long :

T.21,000–T.22,680 ia ki Nonghikai Lower Primary

T.24,250–T.26,190 ia ki Nonghikai Upper Primary

T.34,250–T.36,990 ia ki Nonghikai Secondary

T.36,500–T.39,420 ia ki Nonghikai Higher Secondary

Kane ka lait noh ia ka Composite Annual Increment( peit ia ka jingpynbna)

Ha kawei na ki kyndon ba kongsan, ki Nonghikai SSA bad RMSA mynta kin ioh ia ka jingpynthikna ba ka jingshakri jong ki kan iai bteng haduh da kynjoh ia ka rta ba 58 snem, ka ban shong pat ha ka jinghun ia ka jingtreikam jong ki bad ka jingkhlain ka met ka phad. Hynrei, ka jingpynbna ka pynshai ba ym dei ban shim ia kane ka jingpynbteng ia ka kam kum ka jingpynskhem ia ka kam lane ai ia ka kyrdan nongtrei Sorkar.

Ki Nonghikai ha kane ka jingpynbeit, kin ym don hok ban dawa ia ka jingsiew ba mar katjuh bad ka tulop Sorkar lane ki allowance, bad ki dei ban pynteikam ia ka jingiateh kular bad ki bor ba dei khmih.

Ia ka tulop ki nonghikai SSA, RMSA bad 4th Teacher yn sa pynthep beit beit sha ki Bank Acccount jong ki shimet shimet. Ia kiwei pat ki nonghikai, ka jingphah pisa beit beit sha ki ka donkam ia ka No Objection na ki Managing Committee ki skul.

Ka sorkar ka la bat ruh ia ka bor ban pynbeit ryntih ia ki skul bad ka jingpynkynriah kam ia ki nonghikai ban pynbiang ia ka jingdon nonghikai bad ka jingdon ki khynnah skul.

Ia kane ka jingpynbna la pynmih da u Vijay Kumar Mantri, Commissioner & Secretary ka Tnad Pule Puthi ka Jylla.