Guwahati, Rymphang 13: U Myntri Kam Pohiing ka Ri Amit Shah un sa leit sha ki khappud ka India bad Bangladesh ha ka thain jong ka Cachar District, Assam ha ka 21 tarik u Rymphang ban iashim bynta ha ka jingialang hapoh ka Vibrant Villages Programme (VVP).
Katkum ka tyllong khubor na ka seng, la ong ba u Shah la khmih lynti ba un poi ha Assam ha ka 20 tarik u Rymphang bad un leit sha ka shnong Natanpur kaba don hajan khappud jong ka ri Bangladesh ha ka step kaba bud.
Ha shwa kane ka jingleit jngoh, u myntri sorkar ka Assam u Kaushik Rai, u Deputy Commissioner ka Cachar u Ayush Garg, bad ki heh ophisar na ki shipai iada khappud (BSF) bad ki pulit distrik ki la hiar sha Natanpur ha kane ka sngi Palei ban bishar bniah ia ki jingpynkhreh bad ki jingpynbeit ha kaba iadei bad ka jingpahara.
Ka Natanpur, kaba don ha ka thain Katigorah jong ka Cachar district, ha kine ki snem ba ladep, la sakhi ia ka jingkem ia palat 200 ngut kiba la kynnoh ba ki wan buhai shnong beain, kynthup ia ki trai ri na Bangladesh bad Myanmar.
Kane ka Vibrant Villages Programme, kaba la pynlong da ka tnad Ministry of Home Affairs, ka thmu ban kyntiew ia ka lad kamai kajih, ka kam jngohkai pyrthei, bad ka kolshor katba ka dang pynkhlain ia ka jingpynkiew ia ki sap, ka rep ka riang, bad ki bynta ba iadei bad kane ha ki jaka khappud .
.){kind=link}