Shillong, Rymphang 10 : Ka Jaintia National Council (JNC) kala dawa ia ka jingtohkit kaba bniah halor ka jingjia bthei ka par dewiong ba dang shen ha Mynsngat-Thangsko, kaba la shim ia ka jingim ki 27 ngut ki nongbylla bad kumjuh ruh ia ka jingwan rung beain ki nong Bangladesh ha East Jaintia Hills District.
“Ngim lah ban pdiang ba kane ka jingjia ba sngewsih ka dei kaba kumto. Ka dei ka jingsuba kaba jur ba kane ka lah ban dei ka jingthombor ia ka Jaidbynriew jong ngi” ong u President ka JNC Bah Sambormi Lyngdoh haba iakren bad ki nongthoh khubor ha ka sngi Ba-ar.
Ula pynpaw ia ka jingsngewkhia halor ka jingdon jong ki nong Bangladesh ha ka thain, haba kynnoh ba ki dei ki briew kiba la byrngem ia ka shongsuk shongsain jong ka thain Shatei Lam Mihngi.
“Ngi dawa ba ka jingtohkit kam dei ban kut tang halor ka jingtih dewiong beain, hynrei dei ban kynthup ruh ia ka jingwan rung beain ki nong Bangladesh sha East Jaintia Hills District” ong u Bah Sambormi.
“Ngi dawa ia ka Sorkar Jylla ba kan leh tyngeh pyrshah ia ki nongwei beain kiba sah ha ka District, namar ngim kwah ba ki jaka jong ngi kin long kum ka pliang jai a ki nongbuhai shnong beain. Ngi kyrpad ruh ia ka Tnad Pulit ba kan kut ia kito kiba donkti, khamtam kito kiba don bynta ha kaba wan rah ia ki nongbylla beain na Bangladesh. Kum ka seng, ngi maham ia kito kiba bun ia ka lawei jong ka pateng jong ngi ha ka jingma tang ban myntoi shimet” ula bynrap.
Haba iadei bad ka jingtih dewiong beain, ka JNC kala kyrpad ia u Myntri Rangbah Duh ka ri bad ki Myntri ka Sorkar Pdeng ba kin shah ia ka jingtih dewiong da ka jingstad saian ha ki par kiba rit ha Meghalaya, haba pynpaw ba kane kan iarap ban pynduhjait ia ka jingtih dewiong beain bad kan pynmyntoi ruh lang ia ki paidbah bad ia ka Sorkar.
“Ka jingtih dewiong da ka jingstad saian la shah tang ia kito kiba don jaka ba 100 hectare lane palat. Khyndiat eh ki briew ki don ia ka jaka bah eh katne, bad kane ka dei ka daw bah kaba pynbor ia ki trai shnong ba kin tih dewiong beain” batai u Bah Sambormi.
Ula ong ba ka jingjia ha Mynsngat-Thangsko kala pynkhynniuh ym tang ia ka Meghalaya hynrei ia ka ri baroh kawei. Wat u Myntri Rangbah Duh Narendra Modi ula pynbna ia ka song jingiarap sha ki longiing jong kito kiba iap bad bun ki Myntri ka Sorkar Pdeng kila pynrem ia kane ka jingjia.
 kala dawa ia ka jingtohkit kaba bniah halor ka jingjia bthei ka par dewiong ba dang shen ha Mynsngat-Thangsko, kaba la shim ia ka jingim ki 27 ngut ki nongbylla bad kumjuh ruh ia ka jingwan rung beain ki nong Bangladesh ha East Jaintia Hills District.){kind=link}