Shillong, Rymphang 09: U Symbud Myntri Rangbah ka Jylla bad MLA ka Nartiang constituency Bah Sniawbhalang Dhar hynne ka sngi u la noh synniang T.7 lak sha ka Mynkrem Sports Club ban pynbha iaka madan football.
Kane ka Project ban pynbha iaka Madan Football ka kynthup ban siej dieng kol, bad ban thaw ia ka jaka kaba biang na ka bynta ki kam ialehkai bad kilan met.
Haba iadei bad kane ki nongialam ka Mynkrem Sports Club ki la pynpaw ka jingsngewnguh ïa ka jingkyrshan jong u Bah Sniawbhalang da kaba ong, “Kane ka jingthmu ka wan ha ka por kaba biang, kaba pynpaw ïa ka jingangnud jong u ban kyntiew ïa ka jingïalehkai bad ka jingkiew jong ki samla ha ka thaiñ.”
Ki nongmihkhmat ki la ai khublei ruh ïa ka rukom treikam ba shimkhia jong u Bah Sniawbhalang da kaba ong, “Ka jingpyrshang jong u ka pyni ia ka jingaiti jong u ban pynroi ïa ki sap jong ki samla bad ban pynshlur ïa ka jingïashim bynta jong ki ha ka imlang sahlang”.
