Shillong, Rymphang 06 : U Myntri Rangbah ka Jylla Conrad K Sangma ha ka sngi Thohdieng, ula pynshlur ia ki paid nongshongshnong ba kin iashimbynta shitrhem ha ka jingiadon bynta lang ha ka jingpynkhreh ia ka mang tyngka jong ka Jylla.
U Conrad ula pynpaw ia kane haba pyniaid ia ka jingialang syllok halor ka mang tyngka (pre-budget consultation) na ka bynta u snem mang tyngka 2026-27.
U Conrad ula iakren bad ki nongiashimbynta ba kynthup ia ki stad kot, ki economist, ki seng bhalang, ki seng ki nongrep, ki Ophisar Sorkar bad ki nongthoh khubor, da kaba jubab ia ki jingkylli bad ki jingai jingmut halor ka pla tyngka, ka pule dangle, ka sap treikam, ka sengkam sengjam, ka kam jngohkai bad ki kam pynroi bapher bapher.
Ia ki jingiakren baroh la buh jingthoh da ka Tnad Finance ba kan shong bishar bad leh ia kaba donkam.
Ki jingai jingmut jong ki riew paidbah lyngba ki kor online ruh la iakren ha kane ka jingialang. Lah ban kdew ba ka Dorbar Mang tyngka jong ka Jylla kan sdang naduh ka 16 tarik Rymphang haduh ka 27 tarik.
U Conrad ula iathuh ia ki jingjop jong ka Jylla ha ki kam bapher bapher ha kine ki phra snem ban wan, haba pyntip ia ka kyrdan jong ka Jylla kum ka Jylla ba wan ba-ar napdeng kiwei pat ki Jylla ha ka jingkiew sted ka GSDP, hadien jong ka Tamil Nadu.
Haba batai ia ka pla tyngka ka Jylla, la pynpaw ba ka Meghalaya ka dei tang ma ka na ki Jylla hapoh ka ri ban kot ia ka jingkiew ka GSDP ba 10% ha kine ki laisnem kynter hadien ka COVID.
Ka jingpynlut baroh lang kala kiew palat ia ka lai shah, ka jingshakri paidbah kala kham bha, ki project jingtei ba kongsan kila iaid nalor ka jingplie lynti bha ia ki paidbah.
Ka jinglah pyntreikam bha ka Jylla ia ka skhim hapoh ka Special Assistance to States for Capital Investment (SASCI), kaba tyrwa 50 snem ka ram ba khlem sut, kaba long kum ka grant, kala pynlah shibun shah ia ka jingpynkha ia ki nongkynti, kaba la ailad ruh ia ka Meghalaya ban nang ioh kham bun ia ka song pisa na kane ka prokram.
Ka Externally Aided Projects (EAPs) kala kyrshan ia kiba bun ki prokram ba lamkhmat da ki nongshongshnong kynthup ia ka MeghLAMP, MeghARISE, bad ka Climate Adaptive Community Based Water Harvesting Project.
Ia mynta, ki don 15 tylli ki project EAP kiba dang pyntreikam ha ka jingmang pisa ba kot T.12,100 klur iakaba 90% ka pisa la bei da ka Sorkar India bad 10% la bei da ka Jylla.
